სასიამოვნო სურათი არ არის, თუმცა, ჩვენი შეხედულებით, ცალკეული ინციდენტია, – პირველი არხის ცნობით, ამის შესახებ ევროკავშირის საგარეო ქმედებათა სამსახურის მმართველმა დირექტორმა მიხაელ ზიბერტმა პარლამენტის შენობასთან ევროკავშირის დროშის დაწვასთან დაკავშირებით განაცხადა.
„პირადად მე, ბოლო კვირის, ბოლო ათი დღის განმავლობაში ვნახე ბევრი ვიდეო, სადაც ევროპული დროშა ძალიან მამაცურ ვითარებაში ფრიალებდა, მე ვნახე ქალი, რომელიც ევროკავშირის დროშას წყლის ჭავლის წინაშე აფრიალებდა. ეს სურათი რჩება ჩემს მეხსიერებაში“, – აღნიშნავს მიხაელ ზიბერტი.
დღეს ძალადობრივმა ჯგუფებმა პარლამენტის წინ აღმართული ევროკავშირის დროშა ჩამოაგდეს და დაწვეს.
მომხდარ ფაქტთან დაკავშირებით შინაგან საქმეთა სამინისტრომ ადმინისტრაციული წარმოება დაიწყო, რაც საჯარო დაწესებულების მიერ აღმართული/გამოფენილი ევროპის კავშირის, ჩრდილოატლანტიკური ხელშეკრულების ორგანიზაციის ან სხვა საერთაშორისო ორგანიზაციის ოფიციალური სიმბოლოს შებღალვას გულისხმობს. უწყების ცნობით, სამართალდამცველების მიერ მოხდება სამართალდამრღვევი პირების იდენტიფიცირება და დაჯარიმება.
