7 დეკემბერს, 19:00 საათზე, კოტე მარჯანიშვილის სახელობის სახელმწიფო დრამატულ თეატრში მოქვის სახარების გადასარჩენად საქველმოქმედო აქცია-კონცერტი გაიმართება.
ღონისძიების ორგანიზატორები არიან ხელნაწერთა ეროვნული ცენტრის მეგობართა საზოგადოება, ივანე ჯავახიშვილის სახელმწიფო უნივერსიტეტის სტუდენტური თვითმმართველობა და მარჯანიშვილის თეატრი. ღონისძიების მხარდამჭერები არიან თბილისის მერია და აფხაზეთის ავტონომიური რესპუბლიკის მთავრობა. ბილეთებიდან შემოსული თანხა სრულად მოხმარდება მოქვის სახარების გადარჩენის მრავალწლიან და ძვირადღირებულ პროექტს.
ღონისძიებაზე სიტყვით გამოვლენ საქართველოს პარლამენტისა და მთავრობის წევრები და საზოგადოებას მხარდაჭერისაკენ მოუწოდებენ.
კონცერტში მონაწილეობას იღებენ ქართველი მომღერლები და ანსამბლები: ლიზა ბაგრატიონი, თამრიკო ჭოხონელიძე, ეკა მამალაძე, გიორგი უშიკიშვილი და ანსამბლი "ლაშარი'', დათო არჩვაძე და თეატრალური კვარტეტი, ზუმბა, ნიაზ დიასამიძე, ნეკა სებისკვერაძე, სოფო ხალვაში, სამების საკათედრო ტაძრის მგალობელთა გუნდი, ანსამბლი "მართვე'', ანსამბლი "ბასიანი'', აფხაზეთის ახალგაზრდული კაპელა და სხვ.
მარჯანიშვილის თეატრში მოქვის სახარების შესახებ ასევე მოეწყობა მცირე გამოფენა, სადაც წარმოდგენილი იქნება საინფორმაციო ბანერები და სახარების მულაჟი.
ღონისძიებაზე მისულ სტუმრებს საშუალება ექნებათ შეიძინონ პატარა კალიგრაფების მიერ ქაღალდზე, მუყაოსა თუ კერამიკულ ნაწარმზე იქვე, საგანგებოდ შესრულებული სამახსოვრო წარწერები და მოქვის სახარების დეტალების ასლები. გაიყიდება ასევე საგანგებოდ ამ აქციისათვის დამზადებული, მოქვის სახარებასთან დაკავშირებული სხვადასხვა სახის სუვენირები. შემოსული თანხა სრულად მოხმარდება მოქვის სახარების კონსერვაციას.
მოქვის სახელით ცნობილი ხელნაწერი დანიელ მოქველი მთავარეპისკოპოსის დაკვეთით ეფრემს 1300 წელს აფხაზეთში გადაუწერია. საწერ მასალად გამოყენებულია სპილოს ძვლისფერი ეტრატი.
ხელნაწერი XIII-XIV საუკუნეებისთვის უჩვეულო მინიატურების სიუხვითაც გამოირჩევა. ხელნაწერის მხატვრულ თავისებურებას ფურცლოვან ოქროზე შესრულებული მინიატურები წარმოადგენს. სახარების მხატვრულ სახეს 155 მინიატურა, 10 კამარა და 530-მდე საზედაო ასო და ინიციალი განსაზღვრავს, რაც პალეოლოგოსური ხელოვნების საუკეთესო ნიმუშია ქრისტიანულ ტრადიციულ კულტურაში.
მოქვის სახარების მძიმე მდგომარეობა მისი თავდაპირველი შენახვის არასწორი პირობებით იყო გამოწვეული, რასაც თან სავარაუდოდ, წიგნის შექმნის დროს დაშვებული ტექნოლოგიური პროცესების დარღვევაც დაერთო (ფურცლოვანი ოქროსა და ეტრატის შემაკავშირებელი წებო გამოშრა, რამაც მათი ჩამოშლა გამოიწვია).
ხელნაწერთა ეროვნული ცენტრის აქციას მოქვის სახარების გადასარჩენად მხარდაჭერა გამოუცხადეს შემდეგმა ორგანიზაციებმა და სახელმწიფო სტრუქტურებმა: საქართველოს პარლამენტი; თბილისის მერია; განათლებისა და მეცნიერების სამინისტრო; აფხაზეთის ავტონომიურმა რესპუბლიკის მთავრობა; მარჯანიშვილის თეატრი; საპატრიარქოს ტელევიზია "ერთსულოვნება"; ნოტარიუსთა პალატა; სემეკი; ბანკი რესპუბლიკა; თიბისი ბანკი; ვითიბი ბანკი; ფონდი ღია საზოგადოება - საქართველო; კოალიცია სამართლიანობისთვის.
