გმირთა მემორიალთან საქართველოს ტერიტორიული მთლიანობისთვის დაღუპულთა ხსოვნის უკვდავსაყოფად აქცია „უკვდავების გადაძახილი“ გაიმართა. ადგილზე აფხაზთა კრების ლიდერებთან ერთად ევროპული საქართველოს გენერალური მდივანი აკაკი ბობოხიძე და პოლიტსაბჭოს თავმჯდომარე, გიგი წერეთელი იმყოფებოდნენ.
„უკვდავების გადაძახილი“ არის ტრადიცია, რომელსაც საფუძველი ჩაეყარა 2014 წლის 26 სექტემბერს, იმ გმირების მოსახსენიებლად, რომლებმაც თავი გასწირეს რუსეთ-საქართველოს ომებში ჩვენი ქვეყნის თავისუფლებისათვის.
აქციის ფარგლებში "აფხაზთა კრებამ", „ევროპულმა საქართველომ“ და დამსწრე საზოგადოებამ დაღუპული გმირების სიის წაკითხვით პიროვნულად მოიხსენიეს სამშობლოსათვის თავდადებულები.
“ჩვენ უკვე მეცხრე წელი ვატარებთ აქციას სოხუმის დაცემის დღესთან დაკავშირებით. აქციას ქვია უკვდავების გადაძახილი. ჩვენ მოვიხსენიებთ 92-93 წლებში რუსეთ-საქართველოს ომში დაღუპულ მეომრებს, აგრეთვე ცხინვალის ომში 2008 წელს დაღუპულ მეომრებს, აფხაზეთის ომში დაღუპულ უკრაინელებსა და უკრაინაში დაღუპულ ქართველებს.
ეს არის არამარტო გმირების მოხსენიების აქციაა, არამედ ეს არის მოქმედებისკენ მოწოდება, ვინაიდან თავისუფლებას ყოველთვის სჭირდება დაცვა. ამ ადამიანებმა ყველაზე მნიშვნელოვანი ღირებულება სიცოცხლე გასწირეს ერისთვის ყველაზე მნიშნველოვანი ღირებულებისთვის - სახელმწიფოსთვის. დღეს განსაკუთრებული მნიშვნელობა აქვს მსგავსს აქციებს, რადგან ქართველებს და უკრაინელებს კვლავ უწევთ საქართველოსა და უკრაინის დაცვა. დიდება გმირებს, გაისაღ სოხუმში! “ - მალხაზ პატარაია
„ეს დღეები ძალიან რთული დღეებია გასახსენებლად, მძიმე დღეები, განსაკუთრებით ბუნებრივია 27 სექტემბერი, როცა სამწუხაროდ სოხუმი დაეცა და ამის შემდეგ დაიწყო ძალიან დიდი გზა თავისუფლებისთვის ბრძოლის, მაგრამ ტრაგედიებით აღსასვე ჩვენი ათეულ-ათასობით მოქალაქისთვის. ადამიანებმა, ჩვენმა ნაცნობებმა, ახლობლებმა, ნათესავებმა, თუ სრულიად უცხო თანამემამულეებმა თავი დადეს იმისთვის, რომ მომავალ თაობებს უკეთესი ცხოვრება ჰქონოდათ, გავთავისუფლებულიყავით რუსული მარწუხებისგან, მაგრამ სამწუხაროდ ეს ბრძოლა დღეს გრძელდება.
ჩვენ არ გვაქვს არანაირი უფლება, რომ დავივიწყოთ ამ ადამიანების სახელები. აფხაზთა კრების ინიციატივით დაღუპულ მეომართა სახელების კითხვის ტრადიცია თითქმის 9 წელია არსებობს, რაც ძალიან სიმბოლურია და მნიშვნელოვანი, ეს ბრძოლა გრძელდება, რადგან რაც უკრაინაში ხდება ეს საქართველოს ბრძოლაც არის. ძალიან სამწუხაროა, რომ საქართველოს ხელისუფლების წარმომადგენლები მსგავს აქციებს, იმ აქციასაც, რაც ახლა ზუგდიდში ტარდება და სხვებსაც პროვოკაციებად ნათლავენ, აბსოლუტურად მიუღებელია ამ ადამიანების ხსოვნისთვის, ვის ხსოვნის საპატივცემულოდაც აქ მოვედით“- გიგი წერეთელი
