NASA-მ მთვარეზე მისია "არტემისი-1"-ის გაშვება გადადო, ძრავის გაციების სისტემაში აღმოჩენილი ხარვეზის გამო.
უმძლავრესი რაკეტის მთვარის მიმართულებით გაშვება ფლორიდაში მდებარე კეიპ-კანავერალის კონცხიდან, კენედის კოსმოსური ცენტრიდან 29 აგვისტოს უნდა განხორციელებულიყო.
ამერიკული კოსმოსური სააგენტოს ინფორმაციით, მისია ოთხიდან ერთ-ერთ ძრავასთან დაკავშირებული პრობლემის გამო გადაიდო. გაშვების თარიღი მოგვიანებით გახდება ცნობილი.
დედამიწის თანამგზავრზე განხორციელებეული ბოლო დაშვებიდან 50 წლის შემდეგ, NASA აპირებს უპილოტო კოსმოსური ხომალდის გაგზავნას მთვარეზე მისია "არტემისი-1"-ის (Artemis-1) ფარგლებში.
მისიის ფარგლებში, კოსმოსური გაშვების სისტემა Space Launch System-ის მეშვეობით მთვარის ორბიტაზე უნდა გაეტანათ ეკიპაჟისთვის განკუთვნილი კაფსულა "ორიონი" (Orion Crew Capsule).
სატესტო მისიის მიზანი იყო რეალურ პირობებში გამოეცადა გამშვები სისტემა და მის ბოლოში მიმაგრებული უეკიპაჟო "ორიონის" კაფსულა, რომლითაც შემდგომ მისიაში უკვე ეკიპაჟი გაემგზავრებოდა.
მთავრის ორბიტაზე 42-დღიანი ყოფნის შემდეგ, უეკიპაჟო კაფსულა წყნარ ოკეანეში უნდა დაშვებულიყო.
მისია "არტემისი-1-ის" შემდეგ, NASA გეგმავს კიდევ ორ მისიას - "არტემისი-2" და "არტემისი-3".
შემდგი მისიის - "არტემისი-2-ის" ფარგლებში დაგეგმილია ასტრონავტების გაყვანა მთვარის ორბიტაზე. ხოლო "არტემისი-3" გულისხმობს მთვარეზე ასტრონავტების დაშვებას.
მისიის მესამე ეტაპი 2024 წელს იყო დაგეგმილი, მაგრამ ახლა მოსალოდნელია, რომ ეს მოხდება არა უადრეს 2025 წლისა.
"არტემისის" მისიისთვის 30 მილიარდ დოლარზე მეტია გამოყოფილი. NASA-სა და ევროპის კოსმოსური სააგენტოს ESA-ს გარდა, მასში რამდენიმე სხვა ქვეყნის ორგანიზაცია მონაწილეობს.
ბოლოს მთვარეზე იმყოფებოდა ამერიკელი ასტრონავტი იუჯინ სერნანი, რომელიც 1972 წელს დაეშვა დედამიწის თანამგზავრზე.
შეგახსენებთ, NASA-ს "აპოლოს" პროგრამით მთვარეზე 1969-1972 წლებში 12 ამერიკელი ასტრონავტი გაფრინდა. დღემდე მთვარეზე დედამიწიდან ფეხი სხვა ადამიანს არ დაუდგამს.
