ინდოეთი, მსოფლიოში ბრინჯის უდიდესი ექსპორტიორი, სავარაუდოდ მიწოდებას შეზღუდავს, რადგან შიდა მარაგები საფრთხეშია.
Bloomberg-ის ინფორმაციით, ინდოეთის ამ ნაბიჯმა შესაძლოა, გააძლიეროს ქაოსი სურსათის გლობალურ ბაზრებზე.
ინდოეთის მთავრობა განიხილავს დაქუცმაცებული ბრინჯის ექსპორტის შეზუდვას, რაც ინდოეთის მიწოდების 20%-ს შეადგენს.
დაქუცმაცებულ ბრინჯს ძირითადად იყენებენ ცხოველთა საკვებად ან ეთანოლის წარმოებისთვის ინდოეთში. წელს ფასები გაიზარდა ექსპორტზე მოთხოვნის ზრდის გამო. ყველაზე დიდი მყიდველი ჩინეთია, რომელიც მას ძირითადად პირუტყვის საკვებად იყენებს, ასევე აფრიკის ზოგიერთი ქვეყანა, რომლებიც მარცვლეულს საკვების წარმოებისთვის იყენებს.
ინდოეთზე მსოფლიოში ბრინჯით ვაჭრობის 40% მოდის და ექსპორტის დაანონსებული შეზღუდვები დამატებით დარტყმას მიაყენებს ქვეყნებს, რომლებიც ებრძვიან საყოფაცხოვრებო დანახაჯების გაზრდით გამოწვეულ კრიზისსა და მზარდ შიმშილობას. ექსპორტის შეზღუდვა გავლენას მოახდენს მილიარდობით ადამიანზე, რადგან მსოფლიო ბრინჯის მოხმარების დაახლოებით 90% აზიაზე მოდის.
ბრინჯის ექსპორტის შეზღუდვები განპირობებულია იმით, რომ ინდოეთის ზოგიერთ რეგიონში ნალექის გამო მოსავალი ამ სეზონზე 8%-ით შემცირდა.
ინდოეთმა უკვე შეზღუდა ხორბლისა და შაქრის ექსპორტი, რამაც შოკში ჩააგდო გლობალური ბაზრები.
ინდოეთი არის მსოფლიოში შაქრის უდიდესი მწარმოებელი და მეორე უდიდესი ექსპორტიორი ბრაზილიის შემდეგ. ინდოეთი მსოფლიოში ხორბლის მეორე უმსხვილესი მწარმოებელია. წარმოებული ხორბლის უმეტეს ნაწილს ინდოეთ თავად მოიხმარს.
