სტატისტიკის ეროვნული სამსახური ახალ მონაცემებს აქვეყნებს, რომლის თანახმადაც, 2022 წლის 1-ლი იანვრის მდგომარეობით, საქართველოდან უცხოეთში ემიგრირებული მოქალაქეების რაოდენობა 99 974-ია.

წინა წელთან შედარებით, ეს მაჩვენებელი თითქმის 35%-ით მეტია.

წასვლის მიზეზად მოქალაქეები ქვეყანაში არსებულ მძიმე ეკონომიკურ ვითარებას ასახლებენ.

რაც შეეხება იმიგრანტების რიცხოვნობას, ეს მაჩვენებელი 17.8%-ით შემცირდა და 74 008 კაცი შეადგინა.

იმიგრანტების 82.5% და ემიგრანტების 88.6%, შრომისუნარიან ასაკში მყოფ მოსახლეობას (15-64 წლის ასაკობრივი ჯგუფი) წარმოადგენენ.

საქსტატის მონაცემებით, 2022 წლის 1 იანვრის მდგომარეობით, საქართველოს მოსახლეობის რიცხოვნობამ 3 688.6 ათასი კაცი შეადგინა, რაც წინა წლის შესაბამისი პერიოდის მაჩვენებელთან შედარებით 1.1%-ით ნაკლებია. საქართველოს მოსახლეობის 48% კაცი, ხოლო 52% - ქალია.

2021 წელს დაფიქსირდა უარყოფითი ბუნებრივი მატება (-13 960) და უარყოფითი მიგრაციული სალდო (-25 966).

2022 წლის 1 იანვრის მდგომარეობით, საქართველოს მოსახლეობის 59.7% საქალაქო დასახლებებში ცხოვრობს. ამასთან, თბილისის მოსახლეობა მთლიანი მოსახლეობის თითქმის მესამედს შეადგენს.