მოსკოვში, აშშ-ის საელჩოს მიმდებარე უსახელო ტერიტორიას "დონეცკის სახალხო რესპუბლიკის მოედანი" უწოდეს. ნათქვამია დადგენილებაში, რომელსაც მოსკოვის მერმა მოაწერა ხელი.
ინიციატივა მოსკოვის საქალაქო დუმის დეპუტატებს ეკუთვნით. თავდაპირველად, ისინი ამ ტერიტორიისთვის "დონბასის დამცველთა" სახელის მინიჭებას ითხოვდნენ.
საბოლოო გადაწყვეტილება მოქალაქეებმა ონლაინ პლატფორმაზე მიიღეს, სადაც ხმათა უმრავლესობით მხარი დაუჭირეს უსახელო ტერიტორიისთვის "დონეცკის სახალხო რესპუბლიკის მოედნის" სახელწოდების მინიჭებას.
ინიციატივის განხილვისას, მოსკოვში აშშ-ის საელჩო საპასუხო შეთავაზებით გამოვიდა და განაცხადა, რომ უმჯობესი იქნებოდა, ტერიტორიისთვის სახელი შეერჩიათ "უკრაინელი ჯარისკაცების პატივსაცემად, რომლებიც გაბედულაც იცავენ სამშობლოს კრემლის აგრესიისგან".
შეგახსენებთ, 2018 წელს შეერთებული შტატების დედაქალაქ ვაშინგტონში, ქუჩას, სადაც რუსეთის საელჩო მდებარეობს, ბორის ნემცოვის სახელი უწოდეს.