რუსთაველის გამზირზე გამართულ აქციაზე "შინ ევროპისკენ" წაიკითხეს საქართველოს მოქალაქეების მიმართა ევროკავშირის საბჭოსადმი, რომელმაც სულ რამდენიმე დღეში უნდა მიიღოს გადაწყვეტილება საქართველოს, მოლდოვისა და უკრაინისთვის კანდიდატის სტატუსის მინიჭების თაობაზე.
"ევროკავშირის საბჭოს პატივცემულო წევრებო, ვინაიდან თქვენ უნდა გადაწყვიტოთ ჩვენი ქვეყნის ევროპული მომავალი, ჩვენ, ქართველი ხალხის წარმომადგენლებს გვინდა შეგახსენოთ: საქართველო არის ერთ-ერთი უძველესი ევროპული ერი. საუკუნეების განმავლობაში, ჩვენ არასდროს დაგვიყენებია კითხვის ნიშნის ქვეშ ჩვენი ევროპული ბედი და გავაკეთეთ ყველაფერი, რათა მიგვეღწია ამ ქვეყნის თითოეული თაობის ოცნებისთვის - გავერთიანებულიყავით ევროპულ ოჯახში.
ჩვენ გვჯერა ევროპის ყველა სხვაზე მეტად - ბოლო 30 წლის განმავლობაში, მას შემდეგ, რაც დამოუკიდებლობა დავიბრუნეთ და გადავიხადეთ ფასი ჩვენი ევროპული არჩევანისთვის: ჩვენ გვჯერა თქვენი ყველა სხვაზე მეტად. თქვენ უწყვეტად გვეხმარებოდით, რათა გვქონოდა შესაძლებლობა დაგვეწყო ჩვენი ერის აღმშენებლობა. ჩვენ გვჯერა ევროპული მომავლის, რადგან მას არასდროს ჰქონია უკეთესი ალტერნატივა.
ახლა, როდესაც ჩვენი ევროპული მომავლისთვის ყველაზე მნიშვნელოვანი ნაბიჯი ასე ახლოსაა, იმედი გვაქვს, რომ თქვენ ჩვენში გექნებათ რწმენა სხვებზე მეტად და საქართველოს მიანიჭებთ კანდიდატის სტატუსს ჩვენს მეგობრებთან, უკრაინასთან და მოლდოვასთან ერთად. ქართველმა ხალხმა მოიპოვა ევროპული პერსპექტივა დიდი ხნის წინ და ახლა იმსახურებს, რომ მიიღოს ევროკავშირის კანდიდატი ქვეყნის სტატუსი. ჩვენ, ყველას გვაქვს თქვენი მხარდაჭერის იმედი", - ნათქვამია მიმართვაში.
