„ჩვენსა და სამედიცინო სისტემას შორის უნდა არსებობდეს რგოლი, რომლის მოტივაცია იქნება: რაც უფრო ჯანმრთელი იქნება ადამიანი, მით მეტ მოგებას მიიღებს ის" - ამის შესახებ არასამთავრობო ორგანიზაციის „საქართველოს განვითარების პლატფორმა" თავმჯდომარემ, თენგიზ შერგელაშვილმა პოლიტიკურ პარტიებთან საქართველოს ჯანდაცვის სტრატეგიაზე საუბრისას განაცხადა.
„ჩვენს მიერ შეთავაზებული მოდელი არის ერთ-ერთი მიდგომა, რომელიც საყოველთაო, უნივერსალური დაზღვევის მოდელს გულისხმობს. ძალიან ბევრი ცვლილება არის გათვალისწინებული ამ სტრატეგიით. სახელმწიფომ უნდა უზრუნველყოს ჯანმრთელობა ყველასათვის, განურჩევლად მისი სოციალური სტატუსისა. ეს უნდა იყოს ზეპარტიული რეფორმა და მნიშვნელოვანია ყველა პოლიტიკური პარტიის, როგორც საპარლამენტო ასევე, არასაპარლამენტო პარტიების ჩართულობა. პარტიებმა უნდა გასცენ პასუხი თუ რომელი სისტემით უზრუნველყოფენ, ხელისუფლებაში მოსვლის შემთხვევაში, 3,7 მლნ ადამიანისთვის ჯანდაცვის მსოფლიო ორგანიზაციის მიერ განსაზღვრული საყოველთაობის პრინციპს" - აცხადებს შერგელაშვილი.
ორგანიზაციის თავმჯდომარე სისტემურ მიდგომებზე ამახვილებს ყურადღებას და ამბობს, რომ ქვეყანაში უნდა შეიქმნას მოდელი, რომელიც იქნება გრძელვადიანი და სტრატეგიაზე დაფუძნებული. სხვა შემთვევაში, პრობლემები ვერ მოგვარდება და ის იარსებებს ყველა მიმართულებით, რომელიც აფერხებს ქვეყნის განვითარებას და მის ინტეგრაციას ევროპულ სტრუქტურებში.
„საქართველოს განვითარების პლატფორმამ" (GeoDP) პოლიტიკური პარტიების ნაწილს ღონისძიებების ციკლის - „საქართველოს ჯანდაცვის სტრატეგია" ფარგლებში შეხვდა. სარეკომენდაციო დოკუმენტი „საქართველოს ჯანმრთელობის უნივერსალური დაზღვევის დანერგვის სტრატეგია" შემუშავდა „ფრიდრიხ ებერტის ფონდის" (FES) ფინანსური მხარდაჭერით, ჯანდაცვის პოლიტიკის, ეკონომისტებისა და დაზღვევის სპეციალისტების ფართო ჩართულობით.
