ნეპალში, ჰიმალაის მთებში, Tara Air-ის სამგზავრო თვითმფრინავის ჩამოვარდნის ადგილზე, 20 ადამიანის ცხედარი, იპოვეს. იტყობინება Reuters-ი ნეპალის სამაშველო სამსახურზე დაყრდნობით.
ამ დროისთვის, სამძებრო-სამაშველო სამუშაოები კვლავ მიმდინარეობს.
ბორტზე 19 მგზავრი და ეკიპაჟის 3 წევრი იმყოფებოდა: ორი გერმანიის მოქალაქე, ოთხი ინდოელი და 16 ნეპალელი. ადგილობრივი ხელისუფლების განცხადებით, გადარჩენილების პოვნის შანსი მინიმალურია.
თვითმფრინავი 29 მაისს ჩამოვარდა. ბორტთან კავშირი ადგილობრივი დროით დაახლოებით 10:00 საათზე დაიკარგა.
თვითმფრინავი 20-წუთიანი ფრენის დასრულებამდე ხუთი წუთით ადრე ჩამოვარდა. მისი ფრაგმენტები 4000 მეტრის სიმაღლეზე აღმოაჩინეს ჰიმალაის მთებში.
