"ევროპული საქართველოს", ტაბულას, თავისუფლების ინსტიტუტისა და ამომრჩეველთა განათლების საზოგადოების ორგანიზებით 3 აპრილს, 20:00 საათზე პარლამენტის წინ აქცია "უკრაინისა და ჩვენი თავისუფლების მხარდასაჭერად" იმართება.
"სანამ ბოროტების იმპერიის ეს ამაზრზენი აგრესია უკრაინელი ხალხის წინააღმდეგ გრძელდება და ბოროტების იმპერიის და პუტინის საფრთხე არსებობს თავისუფალი სამყაროს, უკრაინისა და პირველ რიგში უკრაინის შემდეგ ჩვენს წინაშე. სანამ ჩვენ არ გვყავს ხელისუფლება, რომელიც ჩვენს ეროვნულ ინტერესებს დაიცავს, მნიშვნელოვანია, მოქალაქეებმა და პოლიტიკურმა პარტიებმა, სხვადასხვა ფორმით, რა ფორმასაც იპოვიან გამოხატონ თავისი პოზიცია ამ საკითხზე, რომ ვერავინ უნდა დაგვათმობინოს თავისუფლება ილუზორული და მოგონილი მშვიდობის ხარჯზე. ეს ძალიან მნიშვნელოვანი ამბავია და ეს აქცია ეძღვნება ამას, ბუნებრივია უკრაინელი ხალხის ბრძოლას, მაგრამ იმ იდეას, ბენჯამინ ფრანკლინის სიტყვები რომ გავიმეოროთ, ყველა საზოგადოება, რომელიც უსაფრთხოების თავისუფლებაზე უარს იტყვის, დაკარგავს თავისუფლებასაც და უსაფრთხოებასაც. მგონია, რომ ასეთი აქციები სხვადასხვა დროს და სხვადასხვა ჯგუფის მიერ უნდა იყოს მანამ, სანამ ეს გამოწვევები არსებობს, რადგან მნიშვნელოვანია, ჩვენი საზოგადოების შიგნით არ დავუთმოთ იმაზე მეტი სივრცე ჩვენი თავისუფლების მტრებს, ვიდრე უკვე აქვთ", - განაცხადა "ევროპული საქართველოს" თავჯდომარე გიგა ბოკერიამ.
"ეს აქცია არ ემსგავსება არცერთ სხვა აქციას, რომელიც საქართველოში ჩატარებულა. არ გვეყოლება სპიკერები, არა იმიტომ, რომ სათქმელი არ იქნება, არამედ ამ აქციაზე რეალურად ნაჩვენები იქნება თაობათა ბრძოლა ჩვენი ისტორიული მიზნისთვის. თუ როგორ არის ერთმანეთს გადაჯაჭვული ჩვენი და უკრაინის ბედი. შევეცადეთ, თვალი გაგვესწორებინა იმ რეალობისთვის, რომ დღეს საქართველოში პოლიტიკური და კულტურული ელიტის წარმომადგენლებიდან არცერთს არ გვაქვს ის რეპუტაცია, რომ ხალხს მივმართოთ იმ ფორმით, რომ არავინ გავაღიზიანოთ. მიუნჰაუზენები ჩვენ არ ვართ, რომ იმ ჭაობში, რაშიც ვიმყოფებით, თავებში ხელი მოვიკიდოთ და ჩვენით ამოვიყვანოთ. ამიტომ გადავწყვიტეთ, რომ უფრო დიდი მიზანი გვეჩვენებინა ხალხისთვის, რომელიც გაცილებით უფრო დიდია, ვიდრე ჩვენ და ჩვენი პოლიტიკოსები ვართ. აქციაზე გვექნება სიურპრიზები, სავარაუდოდ გამოფენა, ასევე კლიპის პრეზენტაცია, რომელიც ჩვენი საჩუქარი იქნება უკრაინელი ხალხისთვის. მოკლედ, კარგი ღონისძიება იქნება იმის გასახსენებლად, თუ რა გვაერთიანებს ჩვენ ყველას.“ - განაცხადა ტაბულასა და ამომრჩეველთა განათლების საზოგადოების (VES) დამფუძნებელმა თამარ ჩერგოლეიშვილმა.
"დღეს წარვადგინეთ 3 აპრილის აქციის კონცეფცია, რომელიც იქნება თვისობრივად განსხვავებული, ის მხოლოდ უკრაინის მხარდასაჭერი აქცია არ იქნება, არამედ საქართველოს მხარდასაჭერი იქნება, როდესაც უნდა ავირჩიოთ ქვეყანამ სად ვართ, ვის ბანაკში ვართ, ამ დროს სამწუხაროდ არც თუ ისე მომზადებული ვართ, გვყავს ხელისუფლება, რომელიც არ წარმოგვადგენს, ამიტომ მნიშვნელოვანია ვისაუბროთ მეტი ჩვენს ფასეულობებზე", - განაცხადა "თავისუფლების ინსტიტუტის" დირექტორმა სალომე ხვადაგიანმა.