შინაგან საქმეთა სამინისტროს საგანგებო სიტუაციების მართვის სამსახურის სამოქალაქო უსაფრთხოების დეპარტამენტის დაგეგმვისა და მზადყოფნის სამმართველოს თანამშრომელმა - ვახტანგ ბოლქვაძემ NATO-ს ეგიდით ჩატარებულ საერთაშორისო სწავლებაში მიიღო მონაწილეობა.
კრიზისის მართვისა და კატასტროფაზე რეაგირების შესახებ გამართული კურსი ბულგარეთის რესპუბლიკაში გაიმართა და მასში ჩართულები იყვნენ სამოქალაქო პირები ნატოს წევრი და პარტნიორი ქვეყნებიდან.
ხუთდღიანი სწავლება მიზნად ისახავდა მონაწილეთათვის ნატოს კრიზისზე რეაგირების სისტემის და პროცესების გაცნობას. ასევე, შეეხებოდა კატასტროფის შედეგად დაზარალებული ქვეყნების მხრიდან NATO EADRCC და ERCC პლატფორმის მეშვეობით საერთაშორისო ჰუმანიტარული დახმარების მოთხოვნის საკითხებს.
სასწავლო კურსი მოიცავდა როგორც თეორიულ ნაწილს, ასევე, სამაგიდე სწავლებებს და სიმულაციურ სავარჯიშოებს. სწავლებაში ჩართულმა პირებმა კვალიფიკაცია აიმაღლეს საგანგებო სიტუაციების დაგეგმვის, მზადყოფნის და კრიზისთან გამკლავების საკითხების შესახებ.
კურსის დასრულების შემდეგ, ვახტანგ ბოლქვაძეს სპეციალური სერტიფიკატი გადაეცა.
