უახლოეს დღეებში კახეთს სამხრეთ-აფრიკელი ბური ფერმერების დელეგაცია ეწვევა.
როგორც კახეთის საინფორმაციო ცენტრი იუწყება, დელეგაციის წარმომადგენლები დედოფლისწყაროს და ახმეტის რაიონებს დაათვალიერებენ.
ვიზიტის მიზანი საქართველოში ბური ფერმერების შესაძლო ჩამოსახლებისათვის ადგილების შერჩევაა.
დაზუსტებული ინფორმაციით, დელეგაცია, ძირითადად, ტრანსვაალის სასოფლო კავშირის წარმომადგენლებით არის დაკომპლექტებული.
შეგახსენებთ, რომ სამხრეთ - აფრიკიდან დელეგაცია კახეთს წელს სექტემბერში ეწვია.
კახეთის რეგიონში დელეგაციის წევრები შეხვდნენ გუბერნატორის მოადგილეს, დაათვალიერეს „შუხმანვაინის" ქართულ-გერმანული საწარმო, სოფელ ნაფარეულში მოინახულეს ძმები გამტკიცულაშვილების ვენახი და მონაწილეობა მიიღეს რთველში. საქართველოში ყოფნისას დელეგაციის წევრებს შეხვედრები ჰქონდათ ეკონომიკისა და ფინანსთა სამინისტროების წარმომადგენლებთან.
დელეგაციის წევრები ასევე შეხვდნენ სოფლის მეურნეობის სამინისტროს ხელმძღვანელ პირებსაც, ვისგანაც მოისმინეს ინფორმაცია სოფლის მეურნეობის დარგში და აგრარულ სექტორში არსებული ვითარების შესახებ.