11-12 აპრილს, "თბილისი - წიგნის მსოფლიო დედაქალაქისა" და საქართველოს წიგნის გამომცემელთა და გამავრცელებელთა ასოციაციის ერთობლივი ინიციატივით, კავკასიისა და შავი ზღვის აუზის ქვეყნების პირველი რეგიონული საგამომცემლო კონფერენცია გაიმართება.
კონფერენციაში მონაწილეობის მისაღებად, თბილისს ოცდაათამდე გამომცემელი და სფეროს წარმომადგენელი ესტუმრება არა მხოლოდ კავკასიისა და შავი ზღვის აუზის ქვეყნებიდან, არამედ ევროპიდან და ამერიკიდან. ღონისძიებაში მონაწილეობას მიიღებენ გამომცემელთა მსოფლიო ასოციაციის (IPA) წარმომადგენლებიც.
შეხვედრები, ძირითადად, პანელ-დისკუსიების ფორმატში წარიმართება და განხილული იქნება სფეროსთვის საინტერესო და აქტუალური საკითხები.
კონფერენციაზე დასწრება, საქართველოში მოქმედი გამომცემლობის, მაქსიმუმ, სამ წარმომადგენელს შეეძლება, რისთვისაც, 21 მარტამდე, რეგისტრაცია უნდა გაიარონ tbwc.ge-ზე მითითებული სარეგისტრაციო ფორმით.
„თბილისი - წიგნის მსოფლიო დედაქალაქი“ UNESCO-ს პროექტია, რომელიც ხორციელდება თბილისის მერიის ფინანსური მხარდაჭერით. პროექტის გენერალური სპონსორია საქართველოს ბანკი.
