21-24 მარტს, ბოლონიის საბავშვო წიგნის საერთაშორისო ბაზრობა, „თბილისი - წიგნის მსოფლიო დედაქალაქის“ მიერ ორგანიზებულ სტენდს, ასევე, ილუსტრატორებსა და საბავშვო მწერლებს უმასპინძლებს.
23 მარტს, ფესტივალის ფარგლებში, დაგეგმილია „თბილისი - წიგნის მსოფლიო დედაქალაქის“ დირექტორ ნინია მაჭარაშვილისა და დირექტორის მოადგილე, ნინო კიკნაძის პანელი. ისინი დაინტერესებულ საზოგადოებას გააცნობენ, ერთი წლის განმავლობაში, თბილისში განხორციელებული პროექტებისა და სხვადასხვა აქტივობების მიმდინარეობის პროცესს, გამოწვევებსა და შედეგებს. ასევე, ისაუბრებენ ბოლონიის საბავშვო წიგნის ბაზრობაზე წარმოდგენილ ქართულ პროგრამაზე.
ბოლონიის წიგნის ფესტივალის ტრადიციულ The Illustrators Survival Corner-ზე, რომელიც ყოველწლიურად მასპინძლობს ილუსტრატორებს, წარდგენილი იქნება სამი ილუსტრატორი: ანა ჯანელიძე, ვარლამ ჯმუხაძე და გიორგი ჯინჭარაძე. ისინი არა მხოლოდ საკუთარ ნამუშევრებს წარადგენენ, არამედ შეხვდებიან გამომცემლებს, ლიტერატურის აგენტებსა თუ საგამომცემლო სფეროს სხვა წარმომადგენლებს, რომლებსაც, სამომავლო თანამშრომლობის დაგეგმვის მიზნით, საკუთარ პორტფოლიოს გააცნობენ.
გაიმართება თბილისის ილუსტრაციის ფესტივალის გამოფენაც. ოთხი დღის განმავლობაში, გამოიფინება საქართველოში მომუშავე ათი ილუსტრატორის ორმოცამდე ნამუშევრის პრინტი.
„თბილისი - წიგნის მსოფლიო დედაქალაქის“ საერთაშორისო პროექტების კოორდინატორი, ლუკა გრიგოლია და ხსენებული ილუსტრატორები, თანამედროვე ქართული საბავშვო ლიტერატურის განვითარებაში არსებული ძვრებისა და სიახლეების თაობაზე ისაუბრებენ.
დაგეგმილია გამომცემლობა „ზოლიანი კატის“ დამფუძნებელ ნიკი თარხან-მოურავის პანელი, რომელიც საქართველოში მოქმედი პატარა გამომცემლობების წინაშე არსებული გამოწვევების შესახებ ილაპარაკებს.
მწერალთა სახლი, ბაზრობის სტუმრებს, ორ საბავშვო ავტორს - მარიამ წიკლაურსა და ვასილ გულეურს გააცნობს, რომლებიც საკუთარ ნაწარმოებებსა და, ზოგადად, საბავშვო ლიტერატურის მნიშვნელობაზე ილაპარაკებენ. ამავე ღონისძიებაზე შედგება, მარიამ წიკლაურის „უჩვეულო კვირადღის“ იტალიური თარგმანის პრეზენტაციაც.
„თბილისი - წიგნის მსოფლიო დედაქალაქის“ ფარგლებში, საბავშვო ლიტერატურის განვითარების მიმართულებით, არაერთი პროექტი განხორციელდა. მათ შორისაა თბილისის საბავშვო წიგნის ფესტივალის დაარსება, რომლის ფარგლებშიც ასევე დაწესდა საბავშვო ლიტერატურული პრემია „ნაკადული“.
„თბილისი - წიგნის მსოფლიო დედაქალაქი“ UNESCO-ს პროექტია, რომელიც ხორციელდება თბილისის მერიის ფინანსური მხარდაჭერით. პროექტის გენერალური სპონსორია საქართველოს ბანკი.
