პარლამენტის შენობასთან მოძრაობა „სირცხვილიას“ ორგანიზებით აქცია გაიმართა. მოგვიანებით აქციის მონაწილეებმა მთავრობის ადმინისტრაციასთან გადაინაცვლეს.
სამოქალაქო მოძრაობა "სირცხვილიას" ინფორმაციით, მთავრობის ადმინისტრაციასთან გამართულ აქციაზე, მისი რამდენიმე წევრი დააკავეს.
"მშვიდობიანი საპროტესტო აქციის დასრულების შემდეგ სრულიად უმიზეზოდ დააკავეს მოძრაობის წევრები გიორგი მჟავანაძე, გიგა მაქარაშვილი, ნოდარ რუხაძე და ზუკა ბერძენიშვილი", - წერს "სირცხვილია".
მოგვიანებით, "სირცხვილიამ" დაწერა, რომ სამართალდამცავებმა ასევე დააკავეს გვანცა პერტია, ნატა ფერაძე და ბაჩი ვალიშვილი.
პოლიციელის თქმით, ისინი საზოგადოებრივი წესრიგის დარღვევის გამო დააკავეს.
აქტივისტებმა მთავრობის ადმინისტრაციის შენობას ტუალეტის ქაღალდები ესროლეს. ისინი უკრაინაში ომში საქართველოს მთავრობის პოზიციას აპროტესტებდნენ.
ამავდროულად, აქციის ორგანიზატორები და შეკრებილი მოქალაქეები ითხოვდნენ:
რუსეთთან სავიზო რეჟიმის დაწესებას
რუსული მედიის აკრძალვას საქართველოში
რუსეთის თვითმფრინავებისთვის საქართველოს საჰაერო სივრცის დახურვას.
