სომხეთის პრეზიდენტი არმენ სარქისიანი გადადგა. შესაბამისი განცხადება სომხეთის პრეზიდენტის ოფიციალურ ვებგვერდზე გამოქვეყნდა.
პრეზიდენტის განცხადებაში, სადაც ის თავის გადადგომის მიზეზებს განმარტავს, აღნიშნულია, რომ მას არ გააჩნია საშინაო და საგარეო პოლიტიკაზე ზემოქმედების ინსტრუმენტები.
"1990-იანი წლების დასაწყისში, დიდი გეოპოლიტიკური ცვლილებებით, ჩვენს ხალხს მიეცა უდიდესი შესაძლებლობა შეექმნა საკუთარი დამოუკიდებელი სახელმწიფო. ჩვენი მისია იყო არა ერთი დროშის მეორეთი ჩანაცვლება, არამედ ისეთი ქვეყნის აშენება, რომელიც საუკუნეების შემდეგ კვლავ უზრუნველყოფდა სომხების უსაფრთხოებას, წინსვლას და კეთილდღეობას.
ხაზს ვუსვამ, რომ დამოუკიდებელი სახელმწიფოს არსებობის მთავარი აზრი არის პასუხისმგებლობის აღებისა და ტარების უნარი, როცა ვაცნობიერებთ, რომ მხოლოდ ჩვენ ვართ საკუთარი გამარჯვებების მშენებელი და დამარცხებებში დამნაშავე.
ასეთი ისტორიული შესაძლებლობით გამხნევებულმა მეც, როგორც ბევრმა ჩემმა თანამემამულემ, ამ მისიას მივუძღვენი ჩემი თავი. სხვადასხვა მიზეზის გამო, ჩემი მონაწილეობა სხვადასხვა ეტაპზე იცვლებოდა, მაგრამ არ ვწყვეტდი ჩვენი საბოლოო ეროვნული წარმატებისადმი რწმენას. და ეს იყო ჩემი მთავარი მოტივაცია, დავთანხმებოდი წინადადებას, გავმხდარიყავი სომხეთის პრეზიდენტი", - წერია პრეზიდენტის განცხადებაში.
"ჩვენ ვცხოვრობთ უნიკალურ რეალობაში. რეალობაში, სადაც პრეზიდენტს არ შეუძლია გავლენა მოახდინოს ომისა თუ მშვიდობის საკითხებზე.
რეალობა, როცა მას არ შეუძლია ვეტო დაადოს იმ კანონებს, რომლებსაც სახელმწიფოსა და ხალხისთვის მიზანშეწონილად არ თვლის.
რეალობა, როდესაც პრეზიდენტის შესაძლებლობები აღიქმება არა, როგორც სახელმწიფოს უპირატესობად, არამედ - საფრთხედ სხვადასხვა პოლიტიკური ჯგუფის მხრიდან.
რეალობა, სადაც პრეზიდენტი ვერ იყენებს თავისი პოტენციალის უმეტეს ნაწილს სისტემური საშინაო და საგარეო პოლიტიკური პრობლემების გადასაჭრელად.
რეალობა, სადაც მსოფლიო მუდმივ ტურბულენტურ ზონაშია, მაგრამ პრეზიდენტს არ აქვს თავისი ქვეყნის დასახმარებლად კონსტიტუციური ინსტრუმენტი.
რეალობა, სადაც სახელმწიფოს მეთაური, ზოგჯერ მისი ოჯახი, სხვადასხვა პოლიტიკური ჯგუფის სამიზნეა. ამ უკანასკნელებს იმდენად არ აინტერესებთ საპრეზიდენტო ინსტიტუტის მიღწევები ქვეყნის საკეთილდღეოდ, რამდენადაც ჩემი წარსული, სხვადასხვა შეთქმულების თეორიები და მითები. ჩემთვის ეს "საზრუნავი" მორალის ფარგლებს სცილდება და საბოლოოდ პირდაპირ გავლენას ახდენს ჩემს ჯანმრთელობაზე.
დიდი ხანია ვფიქრობ, დაახლოებით ოთხი წლის აქტიური მუშაობის შემდეგ გადავწყვიტე რესპუბლიკის პრეზიდენტის თანამდებობა დავტოვო. ეს გადაწყვეტილება სულაც არ არის ემოციური, გარკვეულ ლოგიკას მისდევს.
პრეზიდენტს არ გააჩნია საჭირო ინსტრუმენტები ქვეყნისა და ერისთვის ამ რთულ პერიოდში საშინაო და საგარეო პოლიტიკის რადიკალურ პროცესებზე ზემოქმედებისთვის.
ჩვენი სახელმწიფოსთვის ამ რთულ დროს, როცა ეროვნული ერთიანობაა საჭირო, პრეზიდენტის ინსტიტუტი არ უნდა იყოს ჭორისა და შეთქმულების თეორიების სამიზნე, რათა საზოგადოების ყურადღება გადაიტანოს ყველაზე მნიშვნელოვანი საკითხებიდან.
დღეს, როგორც არასდროს, გვჭირდება აზრიანი, კარგად გააზრებული, აზრიანი ქმედება. წინააღმდეგ შემთხვევაში, ჩვენ, მთელი მსოფლიოს სომხები, ვერ მივაღწევთ ჩვენი მისიის მიზანს და აღმოვჩნდებით ისტორიის მიღმა.
შეცდომის უფლება აღარ გვაქვს!", - წერია პრეზიდენტის განცხადებაში.
არმენ სარქისიანი სომხეთის პრეზიდენტად ეროვნულმა ასამბლეამ (პარლამენტი) 2018 წელს აირჩია.
სომხეთის კონსტიტუციის თანახმად, პრეზიდენტი გადადგომის შესახებ განცხადებას პარლამენტს წარუდგენს. სახელმწიფოს ახალი მეთაურის არჩევამდე, მის მოვალეობას პარლამენტის თავმჯდომარე ასრულებს.
