სახალხო დამცველის რწმუნებული საბა ბრაჭველი, რომელსაც მიხეილ სააკაშვილთან ან მის მკურნალ ექიმთან შეხვედრა ჰქონდა განზრახული, გორის სამხედრო ჰოსპიტალში არ შეუშვეს.
საბა ბრაჭველი, რომელიც ნებისმიერ დაწესებულებაში დაუბრკოლებლად შესვლის მანდატით არის აღჭურვილი, ჰოსპიტალში შესვლის ნებართვას ერთი საათის განმავლობაში ელოდებოდა. მოგვიანებით, ბრაჭველსა და მასთან ერთად მყოფ, სახალხო დამცველის მიერ შექმნილი კონსილიუმის წევრ თენგიზ წულაძეს, ჰოსპიტლის ადმინისტრაციამ აცნობა, რომ დაწესებულებაში შესვლას ვერ შეძლებდნენ.
სახალხო დამცველის რწმუნებულმა, ჰოსპიტალთან შეკრებულ ჟურნალისტებს განუცხადა, რომ სახალხო დამცველის წარმომადგენლის, კანონით გათვალისწინებულ უფლებამოსილების შეფერხებას, სამართლებრივი რეაგირება უნდა მოჰყვეს.
"გუშინ, თავად პატიმრის განცხადებით, იყო არასათანადო მოპყრობის ერთ-ერთ ფაქტი, გვინდოდა ამაზე დამატებითი მტკიცებულების მოპოვება. ჩვენი არშეშვება აჩენს კითხვის ნიშნებს, ხომ არ დამძიმებულა მდგომარეობა ან ხომ არ აქვს რამე ისეთ შეზღუდვას ადგილი, რომლის შესახებაც საზოგადოებას არ აქვს ინფორმაცია. გვითხრეს, რომ ამჟამად პაციენტს რეანიმატოლოგი მეთვალყურეობს, რეანიმატოლოგთან შეხვედრაზეც თანახმა ვიყავით, მაგრამ ამაზეც უარი გვითხრეს, არც დოკუმენტაციას გაგვაცნეს და არც პატიმარს შეგვახვედრეს", - თქვა ბრაჭველმა.
ცოტა ხნით ადრე, გორის სახმედრო ჰოსპიტალმა განაცხადა, რომ ვიზიტორების შესვლა ნებადართული იქნება მხოლოდ 16:00-დან 18:00 საათამდე.
