ნიაგარას ჩანჩქერი საქართველოს დროშის ფერებში წელს უკვე მეორედ განათდება.
2021 წლის 25 დეკემბერს კანადის მიერ საქართველოს დამოუკიდებლობის აღიარების 30 წელი სრულდება. 1991 წლის ბოლოს ეს გადაწყვეტილება კანადის მაშინდელი პრემიერ მინისტრის ბრაიან მალრუნის მთავრობამ მიიღო.
კანადაში საქართველოს საელჩომ ამ თარიღის აღნიშვნა კანადის ყველაზე ცნობილი და პოპულარული ტურისტული ღირსშესანიშნაობის - ნიაგარას ჩანჩქერის - ქართული დროშის ფერებში განათებით გადაწყვიტა. შეგახსენებთ, რომ მიმდინარე წლის 26 მაისს, საქართველოს დამოუკიდებლობის დღეს, ნიაგარას ჩანჩქერი საელჩოს თხოვნით ქართული დროშის ფერებში ერთხელ უკვე განათდა.
სპეციალურმა სტრუქტურამ - ნიაგარას ჩანჩქერის მმართველმა საბჭომ - ამჯერადაც გაითვალისწინა საქართველოს საელჩოს მიმართვა და მიიღო გადაწყვეტილება, რომლის თანახმად, ჩანჩქერი საქართველოს საპატივცემულოდ 2021 წლის 23 დეკემბერს, საღამოს 10 საათზე (ოტავას დროით) განათდება. როგორც მაისში, საელჩო თავის Facebook-ის გვერდზე პირდაპირი ჩართვის მეშვეობით გააშუქებს ამ ფაქტს.
ჩანჩქერის მმართველი ადმინისტრაციის მოუწოდებს ყველას, ვინც გადაწყვეტს, ფიზიკურად დაესწროს ამ ღონისძიებას, დაიცვას ონტარიოს პროვინციაში მოქმედი კოვიდ-რეგულაციები.
