შეერთებული შტატები კორონავირუსის პანდემის გამო დაწესებულ შეზღუდვებს ამსუბუქებს, რითაც სრულდება 18-თვიანი აკრძალვა, რომელიც დიდწილად ბრიტანეთისა და ევროკავშირის ქვეყნების მოგზაურებზე ვრცელდებოდა.
8 ნოემბრიდან უცხო ქვეყნის მოქალაქეებს უფლება ექნებათ, იმოგზაურონ შეერთებულ შტატებში სახმელეთო და საჰაერო საზღვრების გავლით, თუ ისინი სრულად იქნებიან აცრილნი.
თეთრი სახლის განცხადებით, შეერთებული შტატებისკენ მიმავალ მგზავრებს ჯერ კიდევ ჩასხდომამდე მოუწევთ ვაქცინაციისა და/ან კორონავირუსის ნეგატიური ტესტის დამადასტურებელი დოკუმენტის წარდგენა. ამასთან, სრულად ვაქცინირებულ პირებს კარანტინის გავლა აღარ მოუწევთ.
სამოგზაურო აკრძალვები დონალდ ტრამპის ადმინისტრაციამ 2020 წლის მარტში დააწესა.
სრულად აცრილებისთვის მოიხსნება შეზღუდვა სახმელეთო და საზღვაო მიმოსვლებზე კანადასთან და მექსიკასთან. ეს რეგულაციაც ნოემბრის დასაწყისში ამოქმედდება, თუმცა მცირეოდენი განსხვავებებით. ხმელეთიდან შემომავალ ვიზიტორებს ტესტის პასუხი არ მოეთხოვებათ.
ჯერ კიდევ მოქმედი წესების თანახმად, შეერთებული შტატების ტერიტორიაზე ევროპის უმეტესი ქვეყნებიდან შესვლა მხოლოდ ამერიკის მოქალაქეებს, მუდმივ მაცხოვრებლებსა და სპეციალური ვიზის მქონე უცხოელებს შეუძლიათ.