კრემლის პრესსამსახურის ინფორმაციით, რუსეთის პრეზიდენტი ვლადიმირ პუტინი თვითიზოლაციაში გადავიდა.
მათი ცნობით, პრეზიდენტის გარემოცვაში რამდენიმე პირს კორონავირუსი დაუდასტურა.
კრემლის პრესმდივანი დმიტრი პესკოვი ირწმუნება, რომ პუტინმა კორონავირუსის ტესტი ჩაიტარა და იგი "აბსოლუტურად ჯანმრთელია".
მისივე თქმით, გარკვეული დროით იზოლაციაში გადასვლა ნორმალური პრაქტიკაა და ის არ იმოქმედებს პრეზიდენტის მუშაობაზე.
"თვითიზოლაცია პირდაპირ გავლენას არ მოახდენს პრეზიდენს მუშაობაზე, ის აგრძელებს თავის საქმიანობას, თუმცა გარკვეული დროით პირისპირ შეხვედრებს თავს აარიდებს", - დასძენს პესკოვი.
სააგენტო "ინტერფაქსის" ცნობით, პუტინმა ტაჯიკეთს პრეზიდენტ ემომალი რაჰმონთან სატელეფონო საუბრისას განაცხადა, რომ გარემოცვაში გამოვლენილი კორონავირუსის შემთხვევების გამო, იძულებულია დროებით თვითიზოლაციაში გადავიდეს.
მედიის ცნობით, პუტინი დისტანციურად მიიღებს მონაწილეობას ამ კვირაში დუშანბეში დაგეგმილ ორ შეხვედრაში - "კოლექტიური უსაფრთხოების ორგანიზაციის ხელშეკრულების" საბჭოს მცირე და გაფართოებული შემადგენლობის შეხვედრასა და "შანხაის თანამშრომლობის ორგანიზაციის" წევრი ქვეყნების მეთაურთა საბჭოს სხდომაში.