ENG / RUS       12+

ინგა გრიგოლია: დღეს თბილისის საკრებულო ზუსტად იმ ფუნქციას ასრულებს, რასაც საქართველოს პარლამენტი უნდა ასრულებდეს

რესპოდენტის შესახებ

ადგილობრივი თვითმმართველობის არჩევნების შემდეგ პოლიტიკურმა დებატებმა, რომელსაც საზოგადოება ბოლო წლებში საკმაოდ მოკლებული იყო, თბილისის საკრებულოში გადმოინაცვლა. მისი სხდომები დღეს უფრო სააინტერესო და ხმაურიანია, ვიდრე საპარლამენტო სესიები. მეტიც, თავად დეპუტატებიც კი აღიარებენ, რომ ასეთი პოლიტიზებული საკრებულო მიხეილ სააკაშვილის იქ ყოფნის შემდეგ არ ახსოვთ...

აღნიშნულთან დაკავშირებით "ჯი-ეიჩ-ენი" თბილისის საკრებულოში "ქრისტიან-დემოკრატების" ფრაქციის თავმჯდომარე ინგა გრიგოლიას ესაუბრა. მართალია, გრიგოლიას ჯერ მხოლოდ ნახევარწლიანი პოლიტიკური წარსული აქვს, მაგრამ მისი ხმა უკვე საკრებულოშიც ისევე ხმამაღლა ისმის, როგორც თავის დროზე, ტელეეკრანებიდან ისმოდა...

_ ქალბატონო ინგა, უკვე თითქმის ნახევარი წელია საკრებულოში საკმაოდ მაღალი თანამდებობა და ახალი ამპლუა გაქვთ. როგორია დეპუტატის სავარძელი და ფრაქციის თავმჯდომარის რანგში 6-თვიანი მოღვაწეობის თქვენი შეფასება?

_ ძალიან მძიმე რეჟიმში მიწევს მუშაობა. ყოველგვარი გაზვიადების გარეშე, გულწრფელად გეტყვით, ფიქრადაც ვერ წარმოვიდგენდი, რომ შეიძლებოდა ასეთი მძიმე რეჟიმი მქონოდა. ტელევიზიაში მუშაობა, მიუხედავად იმისა, რომ იქ ძალიან ბევრ ენერგიას ვხარჯავდი, ამ სიტუაციასთან შედარებით "ლაითი" მეჩვენება. რაც შეეხება შეფასებას, პოზიტიური აღმოჩნდა ჩვენი აქ შემოსვლა, რადგან დღეს, თბილისის საკრებულო ასრულებს ზუსტად იმ ფუნქციას, რასაც საქართველოს პარლამენტი უნდა ასრულებდეს.

თვითმმართველობის არჩევნებამდე ქართული პოლიტიკური პროცესი ერთგვარ ჩიხში იყო შესული, რაც, უპირველესად, ოპოზიციის მიერ სადეპუტატო მანდატებზე უარის თქმამ განაპირობა. მიმაჩნია, რომ მაშინ ჩვენს კოლეგებს ძალიან დიდი შეცდომა მოუვიდათ, რადგან პარლამენტი, პოლიტიკური დებატების თვალსაზრისით, ფაქტობრივად, უფუნქციო გახდა. არჩევნების შემდეგ კი, ეს პროცესი საკანონმდებლო ორგანოდან საკრებულოშია გადმოსული.

_ არადა, პარლამენტშიც არის ოპოზიცია...

_ კი, მაგრამ, შეიძლება ვთქვათ, რომ პარლამენტში მხოლოდ ერთი ძირითადი ოპოზიციური ფრაქციაა წარმოდგენილი "ქრისტიან-დემოკრატების" სახით. სწორედ "ქრისტიან-დემოკრატები" აღმოჩნდა მარტო უზარმაზარი უმრავლესობის პირისპირ. თუმცა, მიუხედავად იმისა, რომ საკანონმდებლო ორგანოში ჩვენი პარტიის წარმომადგენლები მწვავე განცხადებებითაც გამოდიან და ხელისუფლებას სერიოზულ ოპონირებასაც უწევენ, მიიჩნევა, რომ ეს არის ერთი ფრაქციის და ერთი პარტიის ბრძოლა ხელისუფლების წინააღმდეგ. იქ რომ დამატებით კიდევ თუნდაც ის 15-კაციანი შემადგენლობა ყოფილიყო, რომლებმაც დეპუტატის მანდატებზე უარი თქვეს - იგივე ლევან გაჩეჩილაძე, ეკა ბესელია, გუბაზ სანიკიძე, დავით გამყრელიძე და სხვები, ვფიქრობ, შეიძლებოდა პროცესები სულ სხვაგვარადაც განვითარებულიყო.

რაც შეეხება საკრებულოს, აქ რამდენიმე ოპოზიციური პოლიტიკური ძალაა წარმოდგენილი და შესაბამისად, ჩემი კოლეგები აქ უფრო ჩანან. ტრიბუნა, რომელიც უმცირესობამ, რაღაც პროცესების გამო, თავის დროზე თავისივე ნებით დაკარგა, ადგილს თბილისის საკრებულოში იმკვიდრებს.

- ალბათ, ამიტომაცაა, რომ საკრებულოს სხდომები ხმაურიანია...

- დიახ. სიმართლე გითხრათ, ვერც კი წარმოვიდგენდი, რომ თბილისის საკრებულო ოპოზიციისთვის შეიძლებოდა ასეთი მნიშვნელოვანი პოლიტიკური ტრიბუნა ყოფილიყო. ვფიქრობ, თითოეული პარტიის წარმომადგენლების აქ მუშაობის ხარისხი, მომავალ საპარლამენტო არჩევნებზე აუცილებლად აისახება.

- ის ძალები, რომლებიც თვითმმართველობის არჩევნებში არ მონაწილეობდნენ, აღნიშნულის ერთ-ერთ მიზეზად იმას ასახელებდნენ, რომ მუნიციპალურ ორგანოებს დამოუკიდებლად არანაირი მნიშვნელოვანი ცვლილების მოხდენა არ შეუძლია და საჭიროების შემთხვევაში, მის ნებისმიერ კანონპროექტს ზემდგომი ორგანოების მხრიდან ვეტო დაედება...

- შეიძლება რომელიმე ორგანო მართლაც არ იყოს ასეთი ძალა, მაგრამ ეს არ ნიშნავს, რომ უარი უნდა თქვა მასში შესვლაზე.

არ მინდა სხვების სახელით ვილაპარაკო, მაგრამ გავიმეორებ: როგორც ჩანს, ის ადამიანები, რომლებმაც თავის დროზე პარლამენტში შესვლაზე უარი თქვეს, დღეს უკვე ხვდებიან, რომ მანდატები კი არ უნდა გადაყარონ და დახიონ, როცა ამა თუ იმ ორგანოში უმრავლესობით ვერ მოდიან, არამედ მაქსიმალურად გამოიყენონ. ჩვენ მაქსიმალურად ვიყენებთ. არ გადის არც ერთი დღე, რომ "ქრისტიან-დემოკრატებს" არ ჰქონდეს პრესკონფერენცია, შეხვედრები მოსახლეობასთან... ერთი სიტყვით, თბილისის საკრებულო ასეთი პოლიტიზებული მიშა სააკაშვილის აქ ყოფნის შემდეგ არ ყოფილა.

- მოსახლეობასთან შეხვედრები ახსენეთ. ძირითადად, რა კატეგორიის მოქალაქეები მოგმართავენ?

- მე ჯანდაცვის და სოციალური სფერო მაბარია, ამიტომაც ჩემთან ძირითადად მოდიან ძალიან მძიმე სოციალური მდგომარეობის მქონე თბილისელები - ძალიან უბედური ადამიანები და დიდწილად მოდიან ხოლმე მას შემდეგ, რაც ყველა სახელმწიფო სტრუქტურას უშედეგოდ მოივლიან. მოდიან ისეთები, რომლებსაც დახმარებებზე უარი ეთქვათ, ვერ მიაღწიეს სამართალს. მათი რიცხვი დიდია. მართლა ვცდილობთ მათ დახმარებას. ხან გამოგვდის, ხან არ გამოგვდის, მაგრამ ასეთ ადამიანებთან მუდმივი ურთიერთობა გვაქვს.

- რაც შეეხება საკრებულოში წარმოდგენილ სხვა ოპოზიციურ ძალებს, რამდენად კოორდინირებულია თქვენი მუშაობა?

- ძალიან კარგი და კოორდინირებული ურთიერთობა გვაქვს. გეტყვით, რომ აქ, ნომერ პირველი ჩემთვის თინიკო ხიდაშელია. მაშინაც, როცა მე ვიყავი ჟურნალისტიკაში, ის იყო ჩემთვის ძალიან სასურველი რესპონდენტი და დღესაც ის არის ძალიან საინტერესო პარტნიორი. ხშირად ვამბობ, რომ ხიდაშელი უდრის საკრებულოს დანარჩენ 49 წევრს. თინა, რა თქმა უნდა, პირობითად ვახსენე, თორემ გნებავთ კახა კუკავა, ვიქტორ დოლიძე, ზურაბ აბაშიძე, ნათელა მაჭავარიანი ავიღოთ - ყველასთან ვთანამშრომლობთ. დღეს ოპოზიცია არსად არ არის ისეთი ერთსულოვანი, როგორც თბილისის საკრებულოში. თუ ერთი კონკრეტული ფრაქციის თემა და საკითხი გადის, ჩვენ მასთან მიმართებაში ერთსულოვნები ვართ და ეს თანამშრომლობის ძალიან კარგი მაგალითია. მართალია, გადაწყვეტილებების მიღების თვალსაზრისით, საკრებულოში ჩვენ ვერ ვცვლით ბევრ რამეს, მაგრამ სამაგიეროდ, აქ არსებობს ძალიან სერიოზული, ხმაურიანი ტრიბუნა და არ არსებობს არც ერთი დამალული თემა, ოპოზიციამ რომ არ გაახმაუროს.

მიმაჩნია, რომ თუ ხარ პოლიტიკური პარტია, რომელსაც ხელისუფლებაში მოსვლის ამბიცია გაქვს, არჩევით ორგანოში შესვლის ყველა შანსი უნდა გამოიყენო. თუ შენ არ მონაწილეობ არჩევნებში, როგორც ორგანიზმი, კვდები, როგორც პოლიტიკური ნაწილი, აღარ ხარ. შეიძლება ცოტა ხანში გაქრე კიდეც. არ შეიძლება არ იბრძოლო გამარჯვებისთვის... ბევრი აგინეს, ლანძღეს "ქრისტიან-დემოკრატები", მაგრამ განვლილმა დრომ დაადასტურა, რომ არჩევნებთან დაკავშირებით ჩვენ ყველაზე სწორი პოზიცია გვქონდა.

- საარჩევნო პერიოდში თითქმის დარწმუნებული იყავით, რომ საკრებულოს თავმჯდომარის პოსტი თქვენი იქნებოდა. ამ მხრივ, ამომრჩევლების მიმართ გარკვეულწილად იმედგაცრუებული ხომ არ ხართ?

- არავითარ შემთხვევაში. ფრაქციის თავმჯდომარე ვარ და მაქვს ძალიან ბევრი საქმე, ალბათ, ასჯერ მეტიც. არა მგონია, ამაზე მეტად დაკავებული იყოს "ნაციონალების" რომელიმე წარმომადგენელი, თუნდაც თბილისის საკრებულოს თავმჯდომარე.

- იმის თქმა გინდათ, რომ ოპოზიცია მეტს მუშაობს, ვიდრე ხელისუფლება?

- ზუსტად ასეთი განცდა მაქვს.

- თუმცა ტელეეკრანებზე ხელისუფლების წარმომადგენლები უფრო ხშირად ჩანან.

- იმიტომ, რომ ეკრანი ხელისუფლების წარმომადგენელთა ხელშია. ჩვენ "პიარსაზოგადოებში" ვცხოვრობთ, "პიარქვეყანა" გვაქვს. მე რომ მიხეილ სააკაშვილის გამოსვლებს ვუსმენ, განცდა მაქვს, რომ მართლა პარიზში ვცხოვრობ, მაგრამ სინამდვილეში ქვეყანაში სულ სხვა სიტუაციაა - გზებისა და ფასადების უკან დგას უკიდურესად გაჭირვებული ხალხი, თავისი ძალიან მძიმე სოციალური მდგომარეობით.

სხვათა შორის, საკრებულოში ამ დღეებში შემოდის თბილისის ბიუჯეტის პროექტი და ამ საკითხზე ძალიან სერიოზული ბრძოლა მოგვიწევს. შარშან ხელისუფლებამ ხალხის მიმართ დამოკიდებულება მაშინ გამოხატა, როცა 700-მილიონიანი ბიუჯეტიდან ჯანდაცვისა და სოციალური სფეროს მიმართულებით მხოლოდ სამი პროცენტი გამოყო. ეს ნიშნავს, რომ ეს სფეროები ბიუჯეტში პრაქტიკულად არ იყო გაწერილი.

- ამ მიმართულებით რა თანხაა საჭირო დედაქალაქელებისთვის?

- ჩვენი გათვლებით, თბილისის ბიუჯეტის მინიმუმ 20-25 % უნდა იყოს მიმართული ჯანდაცვისკენ. ძალიან დიდი ინტერესით ველოდებით ბიუჯეტის პროექტს - გვაინტერესებს, ხელისუფლება ამჯერად რა პრიორიტეტებს შემოგვთავაზებს. სხდომაზე მას, ალბათ, თავად დედაქალაქის მერი წარმოადგენს. მოკლედ, წინ გველის ძალიან საინტერესო დებატები, რისთვისაც, ბუნებრივია, ვემზადებით.

- ისე, რამდენიმე დღის წინ თავად პრეზიდენტმაც თქვა, რომ თბილისში ყოველი მე-4 ადამიანი უმუშევარია...

- ეს მაჩვენებელი კიდევ უფრო სავალალოა. მე გეტყვით, რომ მაგალითად, თბილისის საკრებულოში შემცირებები დაიწყო. თანამშრომლების 20 %-ს ამცირებენ. აპარატის ძალიან ბევრ თანამშრომელს სამსახურიდან წასვლის შესახებ განცხადებები უკვე დააწერინეს და მაქვს ინფორმაცია, რომ იგივე ხდება სხვა სახელმწიფო უწყებებშიც.

- და მიზეზად რა სახელდება?

- მიზეზი არის ის, რომ ქვეყანაში ეკონომიკა არ მუშაობს და ხელისუფლებას აღარ აქვს რესურსი, ხალხს ხელფასები გადაუხადოს. ამცირებენ იმ ადამიანებს, რომლებიც ამ მთავრობამ არჩევნებზე გამოიყენა - ამუშავა და მათი დახმარებით გაიმარჯვა.

ერთი სიტყვით, ხელისუფლების და მათ შორის მიშა სააკაშვილის თავგამოდებული განცხადებები, რომ ადამიანების დასაქმებაზე მიდის ზრუნვა, არის ტყუილი.

უნდა ითქვას ისიც, რომ ყველაზე დიდი პრობლემა ჯერ კიდეც წინ აქვს და ძალიან მალე დაუდგება ქვეყანას - 2012 წელს, როცა საგარეო ვალების გასტუმრება უნდა დავიწყოთ. 9,5 მილიარდია საქართველოს საგარეო ვალი, მაშინ როცა ქვეყანაში, პრაქტიკულად არაფერი მუშაობს და პრეზიდენტს შეუძლია მივიდეს და ერთი პატარა საწარმო სამჯერ გახსნას. ძალიან მძიმე წლები გველის წინ და ეს სიმძიმე, ვფიქრობ, პოლიტიკურ მდგომარეობაზედაც აისახება. ეს სიტუაცია იმ ანეკდოტს მაგონებს, მიხეილ სააკაშვილმა რომ თქვა და დაგვაჯერა, თითქოს ნოემბერი ცურვის სეზონი იყოს.

- რაც შეეხება საარჩევნო გარემოს გაუმჯობესების თაობაზე ოპოზიციასა და საპარლამენტო უმრავლესობას შორის დაწყებულ მოლაპარაკებებს, ექსპერტები მას სკეპტიკურად უყურებენ...

- არა, რატომ? ჩვენ ძალიან დიდ შედეგს ველოდებით.

- რატომ უნდა წავიდეს ხელისუფლება დათმობაზე ახლა, თუ ეს აქამდე არ გაუკეთებია?

- ხელისუფლება არ წავა, ხელისუფლებას მოუწევს წავიდეს, რადგან ამ პროცესში მთელი საერთშორისო დიპლომატიური კორპუსია ჩართული. "ნაციონალებს", ბუნებრივია, არ უნდათ და ხელს არ აძლევთ საარჩევნო გარემოს შეცვლა და იმ მოთხოვნების დაკმაყოფილება, რასაც ჩვენ ვუყენებთ, რადგან ეს ნიშნავს, რომ შემდეგ არჩევნებზე ისინი ვეღარ მოვლენ ხელისუფლებაში, მაგრამ მათ ამის გაკეთება მაინც მოუწევთ. ერთხელ და სამუდამოდ, ამ ქვეყანაში ერთი ხმა უნდა უდრიდეს ერთს და არა ათს.

_ თუმცა მაისში ჩატარებულ არჩევნებზე ითქვა, რომ ის გაყალბების გარეშე ჩატარდა...

_ უბრალოდ, გაყალბების ფორმა იყო შეცვლილი - აიძულეს ადამიანები, "ნაციონალებისთვის" მიეცათ ხმა. შეიძლება საარჩევნო ურნებში გაყალბებული ბიულეტენების ჩაყრა და არჩევნების ამ ფორმით გაყალბება არ მომხდარა, მაგრამ ამომრჩევლებზე ზეწოლა განხორციელდა.

უნდა ვთქვა ისიც, რომ არჩევნებისთვის უნდა მოემზადოს არა მხოლოდ პოლიტიკური სპექტრი, არამედ საზოგადოებაც. ფაქტია, რომ არჩევნებზე არ წავიდა ოპოზიციის ძალიან ბევრი ამომრჩეველი, რადგან ბოლო პერიოდში მათ დაინახეს დიდი ნიჰილიზმი, რაც ამდენი დაწყებული აქციით და გაუგებარი შედეგით იყო გამოწვეული...

- და მაინც, თუკი ხელისუფლებასთან დიალოგი, მოლაპარაკებები და იმ პოლიტიკური ტრიბუნების გამოყენება, რომელიც "ქრისტიან-დემოკრატებს" პარლამენტსა და საკრებულოებში აქვთ, შედეგს არ გამოიღებს, მმართველ გუნდთან ურთიერთობის რა გზას მიმართავთ?

- სხვადასხვაგვარს. არც აქციების დაწყებას გამოვრიცხავთ. ჩემთვის ყველანაირი გზა მისაღებია. თუ საჭირო გახდება, ქუჩაშიც შეიძლება აღმოვჩნდეთ.

- ქალბატონო ინგა, ინტერვიუს მსვლელობისას პიარზე საუბრობდით - პიარქვეყანა, პიარსაზოგადოება ახსენეთ. ქართული დემოკრატიაც პიარი და მოჩვენებითია?

- დემოკრატიას რაც შეეხება, ამ საკითხს ორი კუთხით შეგვიძლია შევხედოთ. როცა ვსაუბრობთ, რომ ქვეყანაში არ არის დემოკრატია, თავისუფალი სიტყვა და ა.შ., ამას უცხოელები იმით უპირისპირდებიან, რომ არსებობს ამდენი გაზეთი, სადაც ხელისუფლების კრიტიკაც იწერება. ბუნებრივია, შემდეგ გვიწევს მტკიცება, რომ ვინც გაბედავს და ხელისუფლებას ხმამაღლა დაუპირისპირდება, ის ან ციხეში ხვდება, ან სხვა უბედურება ემართება. აქედან გამომდინარე, ვერ ვიტყვი, რომ საქართველო ავტორიტარული სახელმწიფოა, მაგრამ, რასაკვირველია, აქ არ არის დემოკრატიის ის ხარისხი, რაც გვჭირდება. ქვეყნის აღმშენებლობა - იგივე ხიდების აგება, გზების გაყვანა, არის ძალიან კარგი, მაგრამ ეს არ უნდა ხდებოდეს ადამიანების უფლებების შეზღუდვის ხარჯზე. შეიძლება ერთი ადამიანის დარღვეული უფლება უფრო მეტად მნიშვნელოვანი იყოს, ვიდრე აქედან ბათუმამდე დაგებული გზა და ამაზე უნდა შევთანხმდეთ. აი ასეთი ტიპის ქვეყანა გვაქვს.

- დაბოლოს, "ქრისტიან-დემოკრატების" საარჩევნო სლოგანზედაც მინდა გკითხოთ: "დენი 10 თეთრი, გაზი 5 თეთრი, წყალი უფასო". ამ მიმართულებით რა ხდება?

- ამ მიმართულებით გვაქვს ძალიან სერიოზული გეგმები - სასამართლოში სარჩელის შეტანა და იქამდე ხელმოწერების შეგროვება, რომელსაც ძალიან მალე დავიწყებთ და რომელიც, გაძლევთ პირობას, იქნება ზღვარსგადასული რაოდენობა. სწორედ ამ ხელმოწერების საფუძველზე უნდა ვაიძულოთ ხელისუფლება, ტარიფები დაწიოს.

- თუმცა ძალიან ბევრ საკითხზე შეგროვებულა ძალიან ბევრი ხელმოწერა...

- კი, მაგრამ ეს ისეთი თემაა, რომელიც არ მეგულება ოჯახი, მათ შორის ხელისუფლების წარმომადგენლების ოჯახებიც კი, რომ არ აწუხებდეს. 5-ჯერ ძვირი ტარიფით გვაცხოვრებს ეს ხელისუფლება. ასე რომ, სერიოზული გეგმები გვაქვს, რომლის განხორციელებასაც ძალიან მალე დავიწყებთ.

 

"ჯი-ეიჩ-ენი", ესაუბრა ლელა ბაღდავაძე

 
ავტორი: . .