საქართველოში უახლოეს მომავალში ანტივირუსული მედიკამენტების, მონოკლონური ანტისხეულების შემოტანა იგეგმება, - ამის შესახებ თბილისის ინფექციური საავადმყოფოს დირექტორმა, თენგიზ ცერცვაძემ განაცხადა.
„ჩვენთან მალე იგეგმება ყველაზე ახალი ანტივირუსული მედიკამენტების, მომავლის თერაპიის, მონოკლონური ანტისხეულების შემოტანა, რომელიც ჯერ ამერიკის შეერთებულ შტატებში, იაპონიასა და დიდ ბრიტანეთში გამოიყენება. პროტოკოლის რადიკალური ცვლილება არ იგეგმება, რადგან რამდენადაც ეს ვიღაცისთვის ნაკლებად დამაჯერებელი არ უნდა იყოს, აბსოლუტურად არ არის დაკავშირებული გარდაცვალების რიცხვის გაზრდა მკურნალობისა და მართვის ხარისხთან და პროტოკოლში რაიმე ხარვეზის არსებობასთან", - განაცხადა ცერცვაძემ.
თენგიზ ცერცვაძე ჯერ კიდევ თებერვალში ამბობდა, რომ კომუნიკაცია შედგა ორ კომპანიასთან, რომლებმაც შექმნეს მონოკლონური ანტისხეულები.
ცერცვაძის განმარტებით, აღნიშნული კომპანიები საქართველოს მიიჩნევენ დამსახურებულ ქვეყნად, რომ ერთ-ერთმა პირველმა მიიღოს მედიკამენტები, ამასთან, აწარმოებენ საქმეს, რომ პირველი დოზის მიღება უფასოდ ან დიდი ფასდაკლებით მოხდეს.
"ეს ის მედიკამენტებია, რომლებიც თავის დროზე ტრამპს გაუკეთეს და საერთოდ მონოკლონური ანტისხეულებია მკურნალობის მომავალი. მინდა, გავაკეთო სასიხარულო განცხადება, რომ სამივე ეს კომპანია, უფრო სწორად ორივე, ამერიკული კომპანია და სამხრეთ კორეული კომპანია გამოვიდა კავშირზე საქართველოსთან, იყო ტელეხიდები. ამერიკიდან დაგვიკავშირდა ამ კომპანიის რეგიონული ხელმძღვანელობა, ხოლო კორეული ფირმიდან ამირან გამყრელიძეს დაუკავშირდა კორეის ელჩი და ეს ტელეხიდი შედგა სამინისტროში ამერიკულ მხარესთან. ორივე ქვეყნის ტექსტი არის ერთნაირი: ჩვენ ვიცით თუ რა წარმატებით უმკლავდება საქართველო კოვიდინფექციას, ვიცით საქართველოს წარმატებები „კოვიდის“ მართვაში და ამიტომ გვინდა, ეს მონოკლონური ანტისხეულები, ვიწყებთ რა მის დანერგვას მსოფლიოში და მათ მიაჩნიათ საქართველო ერთ-ერთ ყველაზე დამსახურებულ და ღირს ქვეყანად, რომ ერთ-ერთმა პირველმა მსოფლიოში, მსოფლიოს პირველ 20 ქვეყანას შორის გვინდა იყოს საქართველო და შემოგვთავაზეს უნიკალური ამბავი, რომ ისინი აწარმოებენ საქმეს, რომ პირველი პარტია საქართველოს მიაწოდონ უფასოდ ან ძალიან დიდი ფასდაკლებით, ბილ გეითსის ფონდის დახმარებით და სხვა ფონდების დახმარებით", - ამბობდა მაშინ ცერცვაძე.
