სს "ბი ჯი კაპიტალის" ინფორმაციით, სამომხმარებლო ფასების ინდექსი ოქტომბერში გასულ თვესთან შედარებით 2%-ით გაიზარდა (მაშინ, როდესაც სექტემბერში თვიურმა ზრდამ 3.1% შეადგინა), ხოლო წლიური ინფლაცია 9.6%-ს გაუტოლდა.
სს "ბი ჯი კაპიტალში" განმარტავენ, რომ სამომხმარებლო ფასების ინდექსის ზრდა კვლავ განპირობებული იყო სურსათზე ფასების ზრდით, რომელმაც 4.1% შეადგინა მაშინ, როდესაც სექტემბერში 7.5%-ს შეადგენდა.
"გასული 2 თვის განმავლობაში სურსათზე ფასების მნიშვნელოვანი ზრდის შედეგად ჩვენი 2010 წლის სამომხმარებლო ფასების ინდექსის პროგნოზი 8.5%-დან 9.5%-მდე გავზარდეთ. ჩვენი აზრით, თვიური ინფლაცია მიმდინარე წლის დარჩენილ პერიოდში შემცირდება, რაზეც ორი სხვა ფაქტორიც მოახდენს ზეგავლენას, კერძოდ ეროვნული ბანკის მონეტარული პოლიტიკა და ლარის კურსის გამყარება. ხოლო მომავალ წელს ჩვენი პროგნოზით ინფლაცია 5.8%-ს შეადგენს"- აცხადებს "ბი ჯი კაპიტალის" სააქციო კაპიტალის ბაზრის ანალიტიკოსი, გიორგი ირემაშვილი.
სს "ბი ჯი კაპიტალი" (ყოფილი "გალტ ენდ თაგგარტ სექიურითის"), წარმოადგენს საქართველოში მოწინავე საინვესტიციო ბანკს, რომელიც დაარსდა 2000 წელს. კომპანია სთავაზობს კლიენტებს სრულ საინვესტიციო საბანკო მომსახურებას განვითარებადი ბაზრის მქონე ქვეყნებში და ყოფილ საბჭოთა კავშირის რესპუბლიკებში, ძირითადად საქართველოში, უკრაინასა და ბელარუსიაში. კომპანიის საქმიანობის პრიორიტეტული მიმართულებებია საბროკერო მომსახურება აქციებისა და ობლიგაციების შეძენაში, კვლევების ჩატარება, და კლიენტებისათვის საინვესტიციო კაპიტალის მოზიდვა.
2010 წელს, პრესტიჟულმა გამომცემლობამ, "Euromopney"-მ, სს "ბი ჯი კაპიტალი" დაასახელა როგორც განვითარებად ბაზრებზე მოქმედი საუკეთესო საინვესტიციო ბანკი ცენტრალურ და აღმოსავლეთ ევროპაში.
სს "ბი ჯი კაპიტალი"-ს 100% წილის მფლობელია სს "საქართველოს ბანკი".
