კლინიკა "ნიუ ჰოსპიტალის" დირექტორის გიორგი რამიშვილის განცხადებით, კლინიკაში კრწანისის ქუჩაზე ავარიის შედეგად დაშავებულთაგან ერთი ადამიანი გარდაიცვალა.
მისი განცხადებით, კლინიკაში სულ ხუთი დაშავებული შეიყვანეს.
"დაახლოებით ორი საათის წინ კლინიკაში ერთდროულად პოლიტრავმებით შემოიყვანეს ხუთი ადამიანი. აქედან ერთი ადამიანი, გულის გაჩერებით. ის ჩატარებული რეანიმაციული ღონისძიებების მიუხედავად, სიცოცხლესთან შეუთავსებელი დაზიანებებით გარდაიცვალა. ოთხ ადამიანზე აქტიური მუშაობა მიდის. დაშავებულთაგან ერთი ბავშვია, რომელსაც მოტეხილობები აღენიშნება. ზოგიერთის მდგომარეობა მძიმეა, ზოგიერთის საშუალო სიმძიმის", – აღნიშნა გიორგი რამიშვილმა.
თბილისში, კრწანისის ქუჩაზე ავტოსაგზაო შემთხვევა მოხდა. სატვირთო მანქანის მძღოლმა საჭე ვერ დაიმორჩილა და რამდენიმე მსუბუქ ავტომანქანას შეეჯახა. ავარიის შედეგად ერთი ადამიანი ადგილზე გარდაიცვალა, 8 კი დაშავდა.
ფაქტზე გამოძიება 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.
