შეერთებული შტატების პრეზიდენტ ჯო ბაიდენისა და რუსეთის პრეზიდენტ ვლადიმირ პუტინის შეხვედრა გაიმართება ჟენევაში 16 ივნისს, ლა გრანჟის ვილაში, რომელიც ამავე სახელწოდების პარკში მდებარეობს.
აღნიშნული ინფორმაცია შვეიცარიის საგარეო საქმეთა სამინისტრომ გაავრცელა და სამიტის მონაწილეებს მადლობა გამოუცხადა ნდობისთვის.
"აშშ-სა და რუსეთის პრეზიდენტების სამიტი გაიმართება 16 ივნისს, სახელგანთქმულ ლა გრანჟის ვილაში. შვეიცარია მადლობელია ორივე ქვეყნისა, მათ მიერ ჟენევის არჩევით გამოხატული ნდობისთვის“, - ნათქვამია საგარეო საქმეთა სამინისტროს განცხადებაში.
როგორც იუწყებიან, ვილისა და პარკის მიმდებარე ტერიტორიაზე უსაფრთხოების უპრეცენდენტო ზომებია მიღებული. ტერიტორიაზე იმყოფებიან უსაფრთხოების სამსახურის წარმომადგენლები.
სამიტის მიმდინარეობისას შეიზღუდება საჰაერო სივრცე ჟენევის თავზე. უსაფრთხოების განსაკუთრებული ზომებია მიღებული სასტუმრო ინტერკონტინენტალის გარშემო. ადგილობრივი მედიის ინფორმაციით, სწორედ ამ სასტუმროში დაჰყოფს პრეზიდენტი ბაიდენი.
ჯო ბაიდენმა ევროპაში 8-დღიანი ტურნე დაიწყო. ევროპული ტურნეს ფარგლებში, ბაიდენი რუსეთის პრეზიდენტს 16 ივნისს, ჟენევაში შეხვდება.
პუტინთან ჯო ბაიდენი შეიარაღების კონტროლზე, უკრაინის კონფლიქტზე, რუსეთის კიბერთავდასხმებზე, კლიმატურ ცვლილებებსა და რუს ოპოზიციონერ ალექსეი ნავალნის პატიმრობაზე ისაუბრებს.