მე ავიღე პაუზა პარტიული პოლიტიკიდან, არ ვარ არც ერთ პარტიაში და არ ვაპირებ არც ერთ პარტიაში შესვლას. მე ვრჩები საერთო ოპოზიციურ ფლანგზე და გუშინდელი დღის შემდეგ, პარლამენტი გახდა ამ საერთო ოპოზიციური ფლანგის ნაწილი, ამიტომ ვარ აქ, – ამის შესახებ „ევროპული საქართველოს“ ყოფილმა წევრმა, დავით ბაქრაძემ განაცხადა.
მისი თქმით, „ევროპული საქართველოს“ წევრების განცხადებებზე საუბარს და კინკლაობაში შესვლას არ აპირებს.
„ნამდვილად ვერ მივიღებ ვერანაირ ბრალდებას ამ თემაზე. ძალიან ადვილი შესამოწმებელია თითოეული თქვენგანისთვის რაზე ვსაუბრობდი. მე ავიღე პაუზა პარტიული პოლიტიკიდან, არ ვარ არც ერთ პარტიაში და არ ვაპირებ არც ერთ პარტიაში შესვლას. მე ვრჩები საერთო ოპოზიციურ ფლანგზე და გუშინდელი დღის შემდეგ, პარლამენტი გახდა ამ საერთო ოპოზიციური ფლანგის ნაწილი, ამიტომ ვარ აქ. მე ვიღებდი პასუხისმგებლობას პარტიის მიერ ნაჩვენებ შედეგზე. დიახ, მე ავიღე პასუხისმგებლობა, გადავდექი პარტიის თავმჯდომარეობიდან და უფრო მეტიც, შევთავაზე პარტიის მთლიანად განახლება, რაზეც თავად პარტიამ თქვა უარი და რის შედეგადაც თავმჯდომარე გახდა ბატონი ბოკერია. ასე რომ, ვფიქრობ, ყველაფერი არის აბსოლუტურად ნათელი. ჩემი ურთიერთობა „ევროპულ საქართველოსთან“ არის გარკვეული და დასრულებული. არ ვაპირებ ამ თემაზე არანაირ ხელოვნურ კინკლაობაში შესვლას, წარმატებას ვუსურვებ „ევროპულ საქართველოს“, – განაცხადა ბაქრაძემ.
