სააქციო საზოგადოება „ბი ჯი კაპიტალმა" აშშ-ში „საქართველოს რკინიგზის" ოთხდღიანი არასახელშეკრულებო როუდ შოუ დაასრულა.
სს „ბი ჯი კაპიტალის" ინფორმაციით, ღონისძიებამ მოიცვა შეხვედრები 20 წამყვან საინვესტიციო ფონდთან, აშშ-ის სამ მსხვილ ქალაქში.
აღნიშნული ღონისძიება ითვალისწინებდა ინფორმაციის მიწოდებას საქართველოს რკინიგზის მიერ 250 მილიონი აშშ დოლარის ღირებულების ობლიგაციების გამოშვების თაობაზე და შეხვედრებს ობლიგაციების ამჟამინდელ მფლობელებთან.
სს „ბი ჯი კაპიტალში" განმარტავენ, რომ "საქართველოს რკინიგზა" ქვეყნის სარკინიგზო ქსელის მონოპოლისტ კომპანიას წარმოადგენს. მისი წარმომადგენლები, გასულ კვირას, ოთხდღიანი როუდ შოუს ფარგლებში ნიუ-იორკს, ბოსტონსა და ჩიკაგოს ეწვივნენ, სადაც 20 წამყვან საინვესტიციო ფონდს შეხვდნენ, მათ შორის: Templeton Asset Management, Morgan Stanley Asset Management, Fidelity Investments, Eaton Vance da Citadel.
როუდ-შოუზე "ბი ჯი კაპიტალს" წარმოადგენდნენ გაყიდვების უფროსი - ლუკას რომრიელი კიევიდან და ფასიანი ქაღალდების გაყიდვების მენეჯერი - გიორგი შენგელია თბილისის ოფისიდან. ხოლო, "საქართველოს რკინიგზას" - მისი ფინანსური დირექტორი - გიორგი გაგნიძე და ბიზნესის განვითარების მენეჯერი - ირაკლი გეჯაძე.
„შეხვედრები ფონდების მენეჯერებთან, ნიუ-იორკში, ბოსტონსა და ჩიკაგოში ძალიან პოზიტიური იყო. ამერიკელი ინვესტორები გაოცებულნი დარჩნენ იმით, რომ საქართველომ ომისა და გლობალური ეკონომიკური კრიზისის გადატანა ისე შეძლო, რომ არ გადაუხვია თავის ეკონომიკური და პოლიტიკური რეფორმების გზას. ფონდებს, რომლებსაც ჩვენ "საქართველოს რკინიგზის" წარმომადგენლები შევახვედრეთ, სურთ მიიღონ კომპანიისაგან მეტი საინვესტიციო შემოთავაზება მომავალში", განაცხადა ლუკას რომრიელმა.
"საქართველოს რკინიგზის" კორპორატიულმა ბროკერმა და მარკეტ-მეიკერმა, "ბი ჯი კაპიტალმა", გამოშვების დღიდან დაახლოებით 50 მილიონი აშშ დოლარის ღირებულების ფასიანი ქაღალდებით ივაჭრა. ამას გარდა, "საქართველოს რკინიგზის" ევროობლიგაციები (GRAIL 9.875% 2015) შევიდა იმ ობლიგაციების სიაში, რომლებიც ყველაზე აქტიურად იყიდებოდა განვითარებადი ბაზრების ევროობლიგაციების სივრცეში. გასულ შემოდგომაზე, განვითარებად ბაზრებზე მზარდი მოთხოვნის ფონზე, აღნიშნული ობლიგაციების თავდაპირველი 10%-იანი განაკვეთი შეიცვალა 7.9%-იანი განაკვეთით, რაც დაახლოებით 8 პუნქტიან ცვლილებას წარმოდგენს 107.5 - მდე. ვინაიდან აღნიშნული ობლიგაციები სახელმწიფო საკუთრებაში იმყოფება და მისი მხარდაჭერით სარგებლობს, მის მიმართ ინვესტორთა ინტერესი არ იკლებს. ბოლო ორი კვირის განმავლობაში საკრედიტო პირობების გაუარესების მიუხედავად, ობლიგაციებზე შენარჩუნებულია თავდაპირველი სავაჭრო ღირებულება და მომგებიანობა.
"ობლიგაციის სარგებელი შემცირდა 10%-დან 7.9%-მდე და ეს მხოლოდ იმ შემთხვევაში, როდესაც ვაჭრობაში იყვნენ ჩართულები შეზღუდული რაოდენობის ინვესტორები ევროპიდან. ახლა, ამას დაემატება უკვე ამერიკელი ინვესტორების მოთხოვნაც" აცხადებს გიორგი გაგნიძე.
შეგახსენებთ, რომ სს "ბი ჯი კაპიტალი" (ყოფილი "გალტ ენდ თაგგარტ სექიურითის"), წარმოადგენს საქართველოში მოწინავე საინვესტიციო ბანკს, რომელიც დაარსდა 2000 წელს. კომპანია სთავაზობს კლიენტებს სრულ საინვესტიციო საბანკო მომსახურებას განვითარებადი ბაზრის მქონე ქვეყნებში და ყოფილ საბჭოთა კავშირის რესპუბლიკებში, ძირითადად საქართველოში, უკრაინასა და ბელარუსიაში. კომპანიის საქმიანობის პრიორიტეტული მიმართულებებია საბროკერო მომსახურება აქციებისა და ობლიგაციების შეძენაში, კვლევების ჩატარება, და კლიენტებისათვის საინვესტიციო კაპიტალის მოზიდვა.
2010 წელს, პრესტიჟულმა გამომცემლობამ, "Euromoney"-მ, სს "ბი ჯი კაპიტალი" დაასახელა როგორც განვითარებად ბაზრებზე მოქმედი საუკეთესო საინვესტიციო ბანკი ცენტრალურ და აღმოსავლეთ ევროპაში.
სს "ბი ჯი კაპიტალი"-ს 100% წილის მფლობელია სს "საქართველოს ბანკი".
