თბილისის სატრანსპორტო სამსახურის უფროსის, აკაკი ჯოხაძის განცხადებით, ავტობუსების სამარშრუტო ხაზების შემცირებით მგზავრებისთვის სამგზავრო ხარჯები არ გაზრდილა.
როგორც მან "ჯი-ეიჩ-ენს" განუცხადა, ხაზების შემცირებისა და კორექტირების დროს გათვალისწინებული იქნა, ამა თუ იმ უბნიდან მგზავრები ყველაზე ხშირად რომელ ტერიტორიაზე გაადგილებოდნენ.
"როგორც მერია განმარტავს, სამარშრუტო ხაზების გაუქმება მოსახლეობის ნაკადის სიმცირემ გამოიწვია. ახლა მოხდება სამარშრუტო ხაზების ხარისხის გაუმჯობესება. ეს არ ზრდის მგზავრებისთვის ხარჯებს. გავთვალეთ, თითოეული ავტობუსის ხაზიდან მგზავრები ყველაზე მეტად სად მიდიოდნენ. მაგალითად, ავიღოთ ისან-სამგორის რაიონი. მოსკოვის პროსპექტზე ორი ხაზი შეერთდა: 55 და 5. ამ ორივე ხაზს მგზავრების დიდი რაოდენობა მხოლოდ ბარათიშვილის ქუჩამდე მიჰყვებოდა, როცა მაღლივამდე ჰქონდათ მარშრუტი. შესაბამისად, ნათლად ჩანს, რომ ხარჯების გაზრდის ნაცვლად, მოხდა ხაზის მოდერნიზება და კორექტირება. ამ რეფორმის შედეგად ავტობუსების ხაზები ერთი-ორად გაიზრდება", - აცხადებს "ჯი-ეიჩ-ენთან" საუბარში ჯოხაძე.
მისი თქმით, თითოეული კორექტირებული ხაზის ავტობუსებში გამოიკვრება ინფორმაცია სამარშრუტო კურსის შესახებ.
