დღეიდან დედაქალაქში საზოგადოებრივი ტრანსპორტის რაოდენობა შემცირდა. დედაქალაქის მერიისა და შესაბამისი სამსახურების არაერთი გაფრთხილებისა და ახალი მარშრუტების შესახებ სათანადო ინფორმაციის გავრცელების მიუხედავად, აღნიშნულმა ცვლილებამ მოსახლეობას გადაადგილების გარკვეული პრობლემები შეუქმნა. განსაკუთრებით დისკომფორტი შეექმნათ იმ მგზავრებს, რომელთაც რიგი მარშრუტების გაუქმების ან ცვლილების გამო ტრანსპორტის გამოცვლამ მოუწიათ. მეტწილად ეს პრობლემა სტუდენტებს, სკოლის მოსწავლეებსა და მათი მშობლებს, სხვადასხვა უწყების საშუალო და დაბალი დონის მოსამსახურეებს შეეხოთ.
მგზავრების ნაკადის ზრდა დაფიქსირდა ორბელიანისა (ყოფილი კოლმეურნეობის) და ავლაბრის მოედნებზე, მეტროსადგურ ისნის მიმდებარე ტერიტორიაზე, ვარკეთილში, დელისზე და სხვა ადგილებში.
მგზავრების განცხადებით, რიგი მარშრუტების გაუქმების გამო მათი ხარჯები 100%-ით გაზარდა.
"#16 ნომერი ავტობუსის ძველი მარშრუტის გაუქმებამ გვაიძულა, ორი ტრანსპორტით ვისარგებლოთ, როგორც ერთი ასევე მეორე მიმართულებით. შესაბამისად, ხარჯიც 100%-ით გვეზრდება", _ განუცხადეს "ჯი-ეიჩ-ენს" ორბელიანის მოედანზე.
იგივე განაცხადეს ჩოლოყაშვილის გამზირიდან ვაკის მიმართულებით გადაადგილების მსურველმა მგზავრებმა, რომლებიც ტრანსპორტს ამავე მოედანზე ელოდებოდნენ.
მგზავრების გულისწყრომას არ იზიარებს თბილისის სატრანსპორტო სამსახურის უფროსი აკაკი ჯოხაძე. ჯოხაძის თქმით, ავტობუსების სამარშრუტო ხაზების შემცირებით მგზავრებისთვის სამგზავრო ხარჯები არ გაზრდილა.
როგორც მან "ჯი-ეიჩ-ენს" განუცხადა, ხაზების შემცირებისა და კორექტირების დროს გათვალისწინებული იქნა, ამა თუ იმ უბნიდან მგზავრები ყველაზე ხშირად რომელ ტერიტორიაზე გაადგილებოდნენ.
"სამარშრუტო ხაზების გაუქმება მოსახლეობის ნაკადის სიმცირემ გამოიწვია. ახლა მოხდება სამარშრუტო ხაზების ხარისხის გაუმჯობესება. ეს არ ზრდის მგზავრებისთვის ხარჯებს. გავთვალეთ, თითოეული ხაზიდან მგზავრები ყველაზე მეტად სად მიდიოდნენ. მაგალითად, ავიღოთ ისან-სამგორის რაიონი: მოსკოვის პროსპექტზე ორი ხაზი შეერთდა _ 55 და 5. ამ ორივე ხაზს მგზავრების დიდი რაოდენობა მხოლოდ ბარათიშვილის ქუჩამდე მიჰყვებოდა, როცა მაღლივამდე ჰქონდათ მარშრუტი. ნათლად ჩანს, რომ ხარჯების გაზრდის ნაცვლად მოხდა ხაზის მოდერნიზება და კორექტირება. ამ რეფორმის შედეგად ავტობუსების ხაზები ერთი-ორად გაიზრდება", - აცხადებს "ჯი-ეიჩ-ენთან" საუბარში ჯოხაძე.
მისი თქმით, თითოეული კორექტირებული ხაზის ავტობუსებში გამოიკვრება ინფორმაცია სამარშრუტო კურსის შესახებ.
თუმცა ჯოხაძემ არ დააკოკრეტა, იმ მგზავრებისთვის, რომელებიც იმავე მოსკოვის გამზირიდან ვაკეში ან მაღლივი კორპუსის მიმართულებით მოძრაობენ, გაიზარდა თუ არა ხარჯები.
შეგახსენებთ, რომ დღეიდან, პირველი ნოემბრიდან, თბილისში საზოგადოებრივი ტრანსპორტი შემცირდა.
სამარშრუტო ხაზების ავტობუსებში, რომლებიც გაუქმებას ექვემდებარება, გამოკრილი იყო განცხადება, რომელიც მოსახლეობას ამცნობდა ხაზის გაუქმებისა და მისი ჩასანაცვლებელი ალტერნატივის შესახებ.
ცნობისთვის, რამდენიმე დღის წინ "ჯი-ეიჩ-ენს" თბილისის მერიის პრესსამსახურში განუმარტეს, რომ პირველი ნოემბრიდან მოხდება ავტობუსების ისეთი სამარშრუტო ხაზების შემცირება ან გაუქმება, რომელზეც მოსახლეობის მხრიდან მოთხოვნა არ არის.