საქართველოში, შესაძლოა, ინდური ინვესტიციები ჩაიდოს. შესაბამისი დაინტერესება ინდოელმა ინვესტორებმა საქართველოს პრემიერ-მინისტრ ნიკა გილაურთან შეხვედრისას გამოთქვეს.
შეხვედრა მუმბაის ყველაზე მსხვილ საფინანსო ცენტრში შედგა, რომელზეც საქართველოს პრემიერ-მინისტრმა ადგილობრივ ბიზნესმენებს ქვეყნის საინვესტიციო გარემო პირადად გააცნო.
მისი განმარტებით, ინდოელი ბიზნესმენები საქართველოს სოფლის მეურნეობით, ენერგეტიკით, მანქანათმშენებლობითა და ტურიზმით არიან დაინტერესებულნი.
"ინდოელ ბიზნესმენებს საქართველოს შესახებ ინფორმაცია აქვთ და ისინი ახლა კონკრეტული პროექტებით არიან დაინტერესებული", - განაცხადა გილაურმა ინდოეთში ვიზიტის ფარგლებში.
შეგახსენებთ, რომ საქართველოს პრემიერმა აზიური ტურნე 19 ოქტომბერს დაიწყო, რომლის ფარგლებშიც ჯერ ჩინეთს სტუმრობდა. ინდოეთში ის 30 ოქტომბრიდან იმყოფება.
