"ეროვნული საბჭო" ელექტროენერგიისა და ბუნებრივი გაზის შესახებ კანონში შეტანილ ცვლილებას აპროტესტებს და აღნიშნულთან დაკავშირებით საკონსტიტუციო სასამართლოში სარჩელის შეტანასაც აპირებს.
ამის შესახებ დღეს, "ხალხის პარტიის" ოფისში გამართულ პრესკონფერენციაზე, პარტიის თბილისის ორგანიზაციის თავმჯდომარემ როინ ხიჯაკიძემ ისაუბრა.
მისი თქმით, მიმდინარე წლის 1 ოქტომბერს, ელექტროენერგეტიკისა და ბუნებრივი გაზის შესახებ კანონში შევიდა ცვლილება, რომლის მიხედვითაც, კომუნალურ გადასახდებზე ერთი სახის გადასახადის გადუხდელობის შემთხვევაში, პირი დანარჩენი კომუნალური მომსახურების საშუალებებითაც ვეღარ ისარგებლებს. ხიჯაკიძის თქმით, პარლამენტის მიერ კანონში შეტანილი ეს ცვლილება ეწინააღმდეგება კონსტიტუციის მე-20 და 30-ე მუხლებს.
"აღნიშნული წესი 2011 წლის 1 იანვრიდან ამოქმედდება. ეს ეწიინააღმდეგება კონსტიტუციაში მოცემულ მუხლს, სადაც წერია, რომ მომხმარებლის უფლებები უნდა იყოს დაცული", - განაცხადა ხიჯაკიძემ.
მისივე თქმით, კანონში შეტანილი ცვლილების თანახმად, დაწესდება სემეკთან არსებული ერთიანი ადმინისტრირების ორგანო, რომელსაც
კომუნალური მარეგულირებელის სტატუსი ექნება. ხიჯაკიძის თქმით, მოსახლეობისთვის კომუნალური მომსახურების შეწყვეტა სწორედ კომუნალურ მარეგულირებელს დაევალება.
"ეს ორგანო მეწარმეებს კისერზე დააჯდება. სწორედ მათ მოუწევთ აღნიშნული ორგანოსათვის ფულის გადახდა. მაგალითად თუ "თელასი" ან სხვა კომპანია უარს იტყვის ადმინისტრაციული ორგანოს დაფინანსებაზე, მას საქართველოში ბიზნესის წარმოება აეკრძალება", - განაცხადა "ხალხის პარტიის" წევრმა.