ჯანმრთელობის დაზღვევა, მომხმარებლის უფლებების დაცვა და სადაზღვევო ხარისხის ამაღლება, ეს ის საკითხებია, რაზეც სასტუმრო "შერატონ მეტეხი პალასში" საქართველოს სადაზღვევო ასოციაციის ეგიდით მოწყობილ შეხვედრაზე მსჯელობდნენ.
თბილისსა და რეიონებში ჩატარებული კვლევების მიხედვით დგინდება, რომ მოსახლეობის სადაზღვევო მომსახურების კუთხით ვითარება გაუმჯობესებულია და მომხმარებლის კმაყოფილების ხარისხი მაღალია.
"საქართველოს სადაზღვევო ასოციაციის" თავმჯდომარე ამბობს, რომ სადაზღვეო პაკეტებისადმი მოსახლეობის ხელმისაწვდომობა იზრდება.
"კვლევებმა გვიჩვენა, რომ მოსახლეობისათვის სადაზღვევო სერვისები უფრო ხელმისაწვდომი გახდა. თუმცა, არსებობს რიგი პრობლემებისა, რომელიც ბაზარზე ახალი მოთამაშეების აქტიურობასთან, მათ იფრასტრუქტრასთან და მომსახურეობის ხარისხთანაა დაკავშირებული და რასაც ყურადღება უნდა მივაქციოთ,"- აცხადებს "საქართველოს სადაზღვევო ასოციაციის" თავმჯდომარე დევი ხეჩინაშვილი.
სადაზღვეო ასოციაციის მიერ ჩატარებული კვლევებით ირკვევა, რომ გამოკითხულთა 39 %-ს ერთხელ მაინც დასჭირდა დაზღვევის გამოყენება; 28 %-მა ერთხელ მაინც მიმართა სადაზღვევო კომპანიას და შესაბამისად, საჭიროებათა 70 % კომპანიებისადმი მიმართვით მთავრდება, ხოლო 30 %-დან უმეტესობას არ ჰქონდა ინფორმაცია.
გამოკითხვის თანახმად, სახელმწიფო პროგრამებში ჩართული მოსახლეობის 65 % სადაზღვეო კომპანიებს ენდობა, 7 %-ს კი სადაზღვევო კოპანიებისადმი ნდობა არ აქვს, ხოლო 28 %-ს შეფასების გაკეთება გაუჭირდა.
გამოკითხული მოსახლეობის 50 % მიიჩნევს, რომ სადაზღვევო კომპანიები თავის მოვალეობას პირნათლად ასრულებენ, ხოლო გამოკითხული მოსახლეობის 9 %-ის აზრის კომპანიების მომსახურეობა არასრულყოფილია. გამოკითხული მოსახლეობის 41 %-ს შეფასების გაკეთება გაუჭირდა.
საქართველოს სადაზღვევო ასოციაციის ინფორმაციით, 1 სექტემბერს სადაზღვევო ტენდერის შესაბამისად მნიშვნელოვნად შეიცვალა დაზღვეულთა განაწილება კომპანიების მიხედვით - 30 000-მდე ცენტრალური პროგრამით დაზღვეულმა თბილისელმა გადაინაცვლა სადაზღვევო კომპანია "ალფა"-ში, ხოლო მათი პოლისირება ერთი თვის ვადაში უნდა განხორციელებულიყო.
კვლევები 2010 წლის ივლისიდან ოქტომბრის ჩათვლით მარკეტინგული კვლევებისა და კონსულტაციის კომპანია ARC Research-iს, გამოყენებითი კვლევების კომპანია ARC-ის და საქართველოს სადაზღვევო ასოციაციის ახალი სამსახურის - „სადაზღვევო გზამკვლევის" მიერ ჩატარდა.
შესწავლილ იქნა, როგორც თბილისის, ასევე საქართველოს ქალაქების მოსახლეობის დაზღვევის მომსახურებით სარგებლობის ინტენსიურობა, კმაყოფილების ხარისხი, გამოკვეთილი პრობლემები და ა.შ.
ამავდროულად თვალსაჩინოა ის საფრთხეები, რომელიც ბოლო პერიოდის განმავლობაში იკვეთება. კერძოდ, სადაზღვევო ბაზარზე ნაკლებად კვალიფიცირებული და სუსტი ინფრასტრუქტურის მქონე სადაზღვევო კომპანიების გააქტიურებამ გააუარესა სამედიცინო სერვისების ხელმისაწვდომობა და მოსახლეობის კმაყოფილების ხარისხი, რაც ნეგატიურად აისახა სადაზღვევო ინდუსტრიისადმი განწყობის საერთო პოზიტიურ ფონზე.
შექმნილი ვითარება ცხადყოფს, რომ ეს პრობლემა სახელმწიფოს, სადაზღვევო ინდუსტრიის და ყველა დაინტერესებული მხარის მიერ დროულ და ეფექტიან გადაჭრას საჭიროებს, რათა დაზღვეული მოსახლეობის კმაყოფილების გაუარესების ტენდენციამ არ მიიღოს შეუქცევადი ხასიათი და არ გამოიწვიოს როგორც არსებულ დაზღვეულთა უკმაყოფილების შემდგომი ზრდა, ასევე მომავალში დასაზღვევი ჯგუფების იმედგაცრუება და ნიჰილისტური დამოკიდებულება სადაზღვევო მომსახურების მიმართ.
ამ გამოწვევებზე ადეკვატური რეაგირების, დაზღვევის მომხმარებლის უფლებების დაცვის, მათი ინფორმირებისა და ხარისხიანი სადაზღვევო მომსახურების დანერგვის ხელშეწყობის მიზნით, საქართველოს სადაზღვევო ასოციაციაში ამოქმედდა ახალი სამსახური - „სადაზღვევო გზამკვლევი", რომელიც ყველა დაინტერესებულ პირს გაუწევს შესაბამის კონსულტაციას, დაეხმარება მისთვის საინტერესო ინფორმაციის მიღებასა და პრობლემების გადაჭრაში.
