შეერთებული შტატების პრეზიდენტი ჯო ბაიდენი აცხადებს, რომ ის არ მოხსნის სანქციებს ირანის წინააღმდეგ, ვიდრე თეირანი არ შეასრულებს 2015 წლის ბირთვული შეთანხმებით გათვალისწინებულ ვალდებულებებს და არ შეაჩერებს ბირთვულ პროგრამას. ამის შესახებ ბაიდენმა ტელეკომპანია CBS-სთან ინტერვიუში განაცხადა.

ინტერვიუს ანონსში, რომელიც სრულად დღეს ღამის ეთერში გავა, ჟურნალისტის შეკითხვას შეაჩერებს თუ არა ეკონომიკურ სანქციებს თეირანის მოლაპარაკებების მაგიდაზე დასაბრუნებლად ბაიდენმა უპასუხა: "არა".

ამის პარალელურად, ირანის უზენაესმა ლიდერმა აიათოლა ალი ხამენეიმ განაცხადა, რომ შეერთებულმა შტატებმა უნდა მოხსნას ირანის წინააღდეგ დაწესებული ყველა სანქცია, თუ მას სურს, რომ თეირანი შეასრულოს ბირთვული შეთანხმებით გათვალისწინებული ვალდებულებები.

"თუ მათ სურთ, ირანი დაუბრუნდეს თავის ვალდებულებებს, შეერთებულმა შტატებმა ჯერ უნდა მოხსნას ყველა სანქცია", - განაცხადა ხამენეიმ.

აიათოლა ხამენეის განცხადებით, ირანი ასრულებდა ბირთვული შეთანხმების პირობებს, მაგრამ შეერთებულმა შტატებმა და ევროპულმა სახელმწიფოებმა [გერმანია, საფრანგეთი, ბრიტანეთი] გადააბიჯეს თავის ვალდებულებებს.

გასულ თვეს, ირანის საგარეო საქმეთა მინისტრმა, მოჰამედ ჯავად ზარიფმაც მოუწოდა ვაშინგტონს, ირანის წინააღმდეგ დაწესებული სანქციების მოხსნისკენ.

2015 წლის ბირთვული შეთანხმებით, ირანს უნდა შეეზღუდა ბირთვული პროგრამა, სანაცვლოდ კი მისთვის დაწესებული სანქციები მოიხსნებოდა.

2018 წელს დონალდ ტრამპმა დატოვა ბირთვული შეთანხმება, რაც ირანმა საბაბად გამოიყენა, რომ უარი ეთქვა ვალდებულებების შესრულებაზე და კვლავ განეახლებინა ბირთვული პროგრამა.

ირანი, რომელიც აცხადებს, რომ მისი ბირთვული პროგრამა მშვიდობიანია, ამავე დროს ამდიდრებს ურანის მარაგებს, რომელიც შეიძლება გამოყენებულ იქნეს როგორც რეაქტორის საწვავის, ასევე ბირთვული იარაღის დასამზადებლად.

2015 წლის ბირთვული შეთანხმების თანახმად, რომლის მხარეები იყვნენ ირანი, აშშ, ჩინეთი, საფრანგეთი, გერმანია, რუსეთი და დიდი ბრიტანეთი, თეირანს უნდა შეეჩერებინა ურანის გამდიდრება და საერთაშორისო ინსპექტორებისათვის ობიექტებზე დაშვების უფლება მიეცა.

2018 წლის შემდეგ, ტრამპის ადმინისტრაციამ კიდევ უფრო გაამკაცრა სანქციები ირანის მიმართ, პარალელურად თეირანმა ღიად განაცხადა, რომ მას აღარ ჰქონდა ბირთვული შეთანხმებით გათვალისწინებული პირობების შესრულების ვალდებულება და ამ წლის იანვარში ურანის 20%-ით გამდიდრების შესახებ განაცხადა, რითაც დაარღვია 3.67%-იანი ზღვარი [ურანის გამდიდრებაზე]. იარაღის დასამზადებლად საჭიროა 90%-ით სუფთა ურანი.