„პრემიერთან გვექნება შეხვედრა უახლოეს დღეებში. მისგან მოვისმენთ პირველ რიგში მის შეხედულებას მთავრობის ფორმირებასთან დაკავშირებით", - ამის შესახებ ,,ქართული ოცნების“ ოფისში გამართულ ბრიფინგზე საპარლამენტო უმრავლესობის ლიდერმა და პარტიის აღმასრულებელმა მდივანმა ირაკლი კობახიძემ განაცხადა.
კობახიძის თქმით, გაიმართება განხილვა საპარლამენტო უმრავლესობის ფორმატში და გადაწყვეტილება მთავრობის ფორმირებასთან დაკავშირებით ერთობლივად იქნება მიღებული.
მისივე განმარტებით, მთავრობის შემადგენლობაში რაიმე მნიშვნელოვანი ცვლილება, მათ შორის ჯანდაცვის ნაწილში მოსალოდნელი არ არის.
"არსებითად რჩება იგივე შემადგენლობა, რომელიც მუშაობდა აქამდე. რაც შეეხება ცვლილებებს, იუსტიციის ნაწილში არის გამოკვეთილი ცვლილება, სხვა რაიმე ინფორმაცია არ არსებობს რაიმე ცვლილებასთან დაკავშირებით. აქედან გამომდინარე, დაველოდებით პრემიერის პოზიციას. რაიმე მნიშვნელოვან ცვლილებას, მათ შორის ჯანდაცვის ნაწილში არ ველოდებით", - განაცხადა ირაკლი კობახიძემ.
