უკრაინამ დაგმო რუსეთსა და ოკუპირებულ აფხაზეთს შორის ერთიანი ეკონომიკური და სოციალური სივრცის შესახებ პროგრამის დამტკიცება. ამის შესახებ ნათქვამია უკრაინის საგარეო საქმეთა სამინისტროს განცხადებაში.
"ცოტა ხნის წინ რუსეთის ფედერაციისა და აფხაზეთის საოკუპაციო ადმინისტრაციის წარმომადგენლებს შორის შედგა შეთანხმება ე.წ. "საერთო სოციალური და ეკონომიკური სივრცის ფორმირების პროგრამაზე".
უკრაინის საგარეო საქმეთა სამინისტრო მკაცრად გმობს და არ ცნობს ამ "პროგრამის" მიღებას და ასეთ ქმედებებს რუსეთის მიერ ოკუპირებული ტერიტორიების ანექსიის კიდევ ერთ მცდელობად მიიჩნევს.
რუსეთის ფედერაცია განაგრძობს აგრესიას მეზობელი სახელმწიფოების მიმართ და მათი სუვერენული ტერიტორიების ოკუპაციას, უხეშად არღვევს საერთაშორისო სამართლის პრინციპებსა და ნორმებს და თანმიმდევრულად და მიზანმიმართულად აფერხებს საერთაშორისო და რეგიონალურ უსაფრთხოებას.
რუსეთის ფედერაციის ეს ქმედებები უარყოფით გავლენას ახდენს საქართველოს ოკუპირებულ ტერიტორიებზე არსებულ ჰუმანიტარულ ვითარებაზე, განსაკუთრებით მნიშვნელოვნად აფერხებს გაეროს გენერალური ასამბლეის 2008-2020 წლებში მიღებული რეზოლუციების შესრულებას აფხაზეთიდან იძულებით გადაადგილებულ პირთა და ლტოლვილთა მდგომარეობის შესახებ.
უკრაინა თანმიმდევრულად უჭერს მხარს საქართველოს, როგორც სტრატეგიული პარტნიორის, სუვერენიტეტს და ტერიტორიულ მთლიანობას, მის საერთაშორისოდ აღიარებულ საზღვრებში. რუსეთმა უნდა შეაჩეროს საქართველოს ოკუპირებული ტერიტორიების უკანონო ანექსიის პროცესი და შეასრულოს 2008 წლის 12 აგვისტოს ცეცხლის შეწყვეტის ხელშეკრულებით ნაკისრი ვალდებულებები", - ვკითხულობთ განცხადებაში.
რუსეთსა და ოკუპირებულ აფხაზეთს შორის ერთიანი ეკონომიკური სივრცის შესახებ პროგრამის დამტკიცებას ანექსიისაკენ გადადგმულ მორიგ ნაბიჯად აფასებს საქართველოს საგარეო საქმეთა სამინისტრო.
