2020 წლის 3-4 დეკემბერს მიმდინარეობს COVID-19 პანდემიის საკითხზე გაერო-ს გენერალური ასამბლეის საგანგებო სესია. სესიის ფარგლებში, 3 დეკემბერს გამართულ გენერალურ დებატებზე სიტყვით წარსდგა საქართველოს საგარეო საქმეთა მინისტრი, დავით ზალკალიანი.

აღსანიშნავია, რომ საგანგებო სესიის გენერალურ დებატებში მონაწილეობა მიიღეს მსოფლიოს მრავალი ქვეყნის სახელმწიფოსა და მთავრობის მეთაურებმა, საგარეო საქმეთა და ჯანდაცვის მინისტრებმა.

საქართველოს საგარეო საქმეთა მინისტრმა გამოსვლისას ხაზი გაუსვა COVID-19 პანდემიის პირობებში მსოფლიოს მასშტაბით შექმნილ გამოწვევებს და იმედი გამოთქვა, რომ საერთაშორისო თანამეგობრობა გაერთიანებული ძალებით შეძლებს პანდემიით გამოწვეული უპრეცედენტო სირთულეების დაძლევას. იგი მიესალმა, COVID-19-ის საწინააღმდეგო ვაქცინის შექმნის მიმართულებით მიმდინარე უპრეცედენტო გლობალურ თანამშრომლობას.

დავით ზალკალიანმა განსაკუთრებული ყურადღება გაამახვილა ექიმებისა და ყველა იმ მუშაკის ღვაწლზე, რომლებიც არსებულ არაორდინალურ ვითარებაში ვირუსთან ბრძოლის წინა ხაზზე დგანან და მადლიერება გამოხატა მსოფლიო ჯანდაცვის ორგანიზაციის ევროპის რეგიონალური ოფისისადმი, რომელმაც საქართველოს COVID-19-თან ბრძოლაში დახმარება აღმოუჩინა.

საგარეო საქმეთა მინისტრმა აღნიშნა, რომ COVID-19-თან ბრძოლის ამ ურთულეს პერიოდშიც კი, რუსეთი აგრძელებს დესტრუქციული და პროვოკაციული ქმედებების განხორციელებას. დავით ზალკალიანმა ხაზი გაუსვა, რუსეთის მიერ ოკუპირებულ საქართველოს რეგიონებში ადამიანის უფლებათა უხეშ დარღვევებსა და მძიმე ჰუმანიტარულ ვითარებას.

მინისტრმა დაგმო საქართველოს წინააღმდეგ მიმდინარე რუსეთის აგრესიული ქმედებები, მათ შორის, საუბარი შეეხო, რუსეთის მიერ წარმოებული დეზინფორმაციისა და პროპაგანდის ფართომასშტაბიან კამპანიას და გახშირებულ კიბერთავდასხმებს. ხაზი გაესვა, COVID-19-ის წინააღმდეგ ბრძოლაში უმნიშვნელოვანესი ინსტიტუტის - რიჩარდ ლუგარის სახელობის საზოგადოებრივი ჯანდაცვის კვლევითი ცენტრის დისკრედიტირების მიზნით, რუსეთის მიერ მიმდინარე მიზანმიმართულ დეზინფორმაციულ კამპანიას.

დავით ზალკალიანმა ხაზი გაუსვა COVID-19-ის წინააღმდეგ შექმნილი ვაქცინის საყოველთაო და თანაბარი ხელმისაწვდომობის, ასევე სამართლიანი გადანაწილების მნიშვნელობას. გამოსვლის დასასრულს, მინისტრმა ისაუბრა საქართველოს მიერ პოსტ-პანდემიის პერიოდზე გათვლილი, ეკონომიკის აღდგენის მიმართულებით სტრატეგიის შემუშავების თაობაზე და ამ პროცესში, საერთაშორისო მეგობრებისა და პარტნიორების მხარდაჭერის იმედი გამოთქვა.

ინფორმაციას საგარეო საქმეთა სამინისტრო ავრცელებს.