ნავთობპროდუქტების იმპორტიორთა კავშირის თავმჯდომარე ვანო მთვრალაშვილის განცხადებით, მიმდინარე წლის პირველი ცხრა თვის განმავლობაში საქართველოში განხორციელდა 569 079 ათასი ტონა ბენზინისა და დიზელის საწვავის იმპორტი. კერძოდ, 275 451 ათასი ტონა ბენზინი და 293 628 ათასი ტონა დიზელის საწვავი.
გასული წლის ანალოგიურ პერიოდში ნავთობპროდუქტების (ბენზინი, დიზელი) იმპორტმა შეადგინა 598 700 ათასი ტონა. კერძოდ, ბენზინი - 333 984 ათასი ტონა და დიზელის საწვავი - 264 715 ათასი ტონა.
შედეგად, მიმდინარე წლის პირველი ცხრა თვის განმავლობაში საქართველოში ნავთობპროდუქტების (ბენზინი, დიზელი) იმპორტი გასული წლის ანალოგიური პერიოდის მაჩვენებელთან შედარებით შემცირდა 29 620 ათასი ტონით. ძირითადად შემცირებულია ბენზინის იმპორტი, კერძოდ, 58 533 ათასი ტონით, ხოლო დიზელის საწვავის იმპორტი გაზრდილია 28 913 ათასი ტონით.
იმპორტირებულ ბენზინში ყველაზე დიდი წილი უკავია რეგულარი A-92 ტიპის საწვავს - მ/წლის ცხრა თვის განმავლობაში 214 921 ათასი ტონა ანუ 78 პროცენტი, პრემიუმის ტიპის A -95 ტიპის საწვავს - 52 601 ათასი ტონა ანუ 19 პროცენტი და სუპერი ტიპის A -98 ტიპის საწვავს - 7 928 ათასი ტონა ანუ 3 პროცენტი.
რაც შეეხება დიზელის საწვავს, იმპორტირებულ დიზელის საწვავში ყველაზე დიდი წილი უკავია L-62-ს - 214 375 ათასი ტონა ანუ 73 პროცენტი, ხოლო დარჩენილი წილი უკავია ევრო დიზელს.
ბენზინის საწვავის იმპორტის შემცირება არ ნიშნავს იმას, რომ მისი მოხმარება არის შემცირებული. დღეისათვის ბენზინის დიდი მომხმარებელი გადასული არის ბუნებრივი აირის მოხმარებაზე, ვინაიდან ბუნებრივი აირით მანქანის გამართვა გაცილებით იაფია ბენზინის საწვავთან შედარებით (დაახლოებით 1.10 ლარი). შესაბამისად, ტაქსებისა და გადამზიდველი სატრანსპორტო საშუალებების აბსოლუტური უმრავლესობა (რომლებიც განსაკუთრებით დიდი ოდენობის საწვავის მომხმარებლები არიან) ბუნებრივი აირის მოხმარებაზე გადავიდა. აქვე უნდა აღვნიშნოთ, რომ დღეისათვის ბუნებრივი აირის გასამართი სადგურების ინფრასტრუქტურა საკმაოდ კარგად არის განვითარებული როგორც თბილისში, ასევე კახეთის, ქართლის, იმერეთის რეგიონებში.
აქვე უნდა ითქვას, რომ ბოლო წლებში სახელმწიფოს შესაბამისი სტრუქტურების მხრიდან ფაქტიურად აღმოფხვრილია საქართველოს ბაზარზე კონტრაბანდული და აღურიცხავი დიზელის საწვავის რეალიზაციის ფაქტები, რამაც გამოიწვია მისი იმპორტის ზრდა.