პარტია "მოქალაქეების" ლიდერი ალეკო ელისაშვილი შინაგან საქმეთა მინისტრის ვახტანგ გომელაურის გადადგომას ითხოვს. ამის შესახებ ელისაშვილმა ტელეკომპანია "ფორმულას" ეთერში განაცხადა.
"ვითხოვთ გომელაურის გადადგომას. თვითონ უნდა ჰყოფნოდა შეგნებაც, მორალიც, ნამუსიც და თავად უნდა გადამდგარიყო გუშინდელი დღის შემდეგ. ასევე დღევანდელი განცხადების შემდეგ, როდესაც თქვა, რომ "თანხა საქართველოს ბანკის იყო", საქართველოს ბანკი რა ხალხის ფული არაა?", - განაცხადა ალეკო ელისაშვილმა.
შეგახსენებთ, შინაგან საქმეთა მინისტრმა, ვახტანგ გომელაურმა დღეს განაცხადა, რომ თანხა, რომელიც ზუგდიდში, ბანკის ფილიალზე თავდამსხმელს გადასცეს არ იყო ბიუჯეტის და ის საქართველოს ბანკს ეკუთვნოდა.
შეგახსენებთ, გუშინ, ზუგდიდში, ზვიად გამსახურდიას გამზირზე მდებარე ბანკის ფილიალზე განხორციელდა შეიარაღებული თავდასხმა, რომლის დროსაც დამნაშავემ 43 მოქალაქე აიყვანა მძევლად.
თავდამსხმელი 500 000 დოლარს და ვერტმფრენით ან ავტომანქანით ტერიტორიის დატოვებას ითხოვდა.
დღის განმავლობაში მძევლების უდიდესი ნაწილი ეტაპობრივად გათავისუფლდა, რომლებსაც სამეგრელო-ზემო სვანეთის პოლიციის დეპარტამენტის დირექტორი ავთანდილ გალდავა ჩაენაცვლა.
მოგვიანებით, ავთანდილ გალდავამ და სამმა მძევალმა, თავდამსხმელთან ერთად დატოვა ბანკის შენობა.
ბოლო ინფორმაციით, თავდამსხმელმა სამი მძევალი სოფელ კირცხის ტყეში გაათავისუფლა და მიიმალა.