გლდანში, ნიკა მელიას საარჩევნო შტაბთან, "ქართული მარში" ჩვეულ სტილში აქციას მართავს. აქციის მონაწილეები "ნაციონალური მოძრაობისა" და გაერთიანებული ოპოზიციის მაჟორიტარობის კანდიდატს ნიკა მელიას უპირისპირდებიან.
"მარშელებსა" და ნიკა მელიას შტაბს შორის პოლიციის კორდონი დგას.
დაჯგუფების ერთ-ერთი წევრი, თბილისის საკრებულოს ყოფილი თავმჯდომარე ირაკლი შიხიაშვილი აქციაზე ნიკა მელიასთან პირისპირ დებატებს ითხოვს. მათ დებატის ატრიბუტად აქციაზე ფიცრებით შეკრული ტრიბუნაც აქვთ მიტანილი.
„ნიკა მელია, მობრძანდი ერთი ერთზე, ტელევიზიების თანდასწრებით ვუთხრათ ქართველ ერს, ვინ ვინ არის. მინდა პასუხი ერთ რამეზე, ყველაზე მეტად რა გაინტერესებს, იყო მაგ პოლიტიკური ძალის, მოძალადე ძალის ლიდერი, დაემსგავსო პავლიკ მოროზოვს, თუ შენთვის გარეჯი საქართველოა. ამ პასუხს შენგან მოვითხოვთ“, – აღნიშნა ირაკლი შიხიაშვილმა.
როგორც შიხიაშვილი აცხადებს, ორშაბათიდან მთელი საქართველოს მასშტაბით, დაიწყება პიკეტირება „ნაციონალური მოძრაობისა“ და მისი ანასხლეტების.