სოფლის მეურნეობის სამინისტროს ინფორმაციით, არგენტინის ქალაქ მენდოსაში საქართველოს სოფლის მეურნეობის მინისტრის მოადგილემ მალხაზ აკიშბაიამ მოაწერა ხელი შეთანხმებას, რომლის მიხედვითაც საქართველო ღვინით ვაჭრობის მსოფლიო ჯგუფში გაწევრიანდა.
ორგანიზაციაში გაწევრიანებულები არიან ამერიკის შეერთებული შტატები, კანადა, არგენტინა, ჩილე, ავსტრალია და ახალი ზელანდია, ღვინით ვაჭრობის მსოფლიო ჯგუფის მთავარი ამოცანა კი წევრ ქვეყნებს შორის ღვინით გამარტივებული ვაჭრობის უზრუნველყოფაა. შეთანხმების შედეგად, საქართველო თავისი პროდუქციის გატანას შეუფერხებლად და დამატებითი ბარიერების გარეშე მოახერხებს ორ პრიორიტეტულ და ზალიან პერსპექტიულ ბაზარზე - ამერიკის შეერთებულ შტატებში და კანადაში.
"მინდა მივულოცო ყველა ქართველ მეღვინეს საქართველოს ამ ჯგუფში გაწევრიანება. ეს არის არამარტო შეღავათიანი სავაჭრო პირობები სხვადასხვა ქვეყნებთან, არამედ ეს არის მნიშვნელოვანი ინვესტიციების მოზიდვის თვალსაზრისითაც", - განაცხადა სოფლის მეურნეობის მინისტრმა ბაკურ კვეზერელმა. საქართველოს შემდეგ, ღვინით ვაჭრობის მსოფლიო ჯგუფის წევრი ჩინეთიც გახდება, სადაც ღვინის მოხმარება სტაბილურად იზრდება. ღვინით ვაჭრობის მსოფლიო ჯგუფი 1994 წელს შეიქმნა.