ფინანსთა სამინისტროს შემოსავლების სამსახურის თბილისის განახლებული რეგიონული ცენტრი ოფიციალურად გახსნეს პრემიერ-მინისტრმა ნიკა გილაურმა, ფინანსთა მინისტრმა კახა ბაინდურაშვილმა და შემოსავლების სამსახურის უფროსმა გოგა ცხაკაიამ.
შენობის სარემონტო სამუშაოები გასული წლის ივნისში დაიწყო და ახლახანს დასრულდა. სახელმწიფო ბიუჯეტიდან ოფისის მშენებლობა 3 მლნ ლარით დაფინანსდა და იგი აღჭურვილია თანამედროვე საინფორმაციო ტექნოლოგიებით.
„6-8 თვეში მთლიანად დასრულდება ფინანსთა სამინისტროს სისტემის ინფრასტრუქტურული რეორგანიზაცია. ჩვენი მიზანია კერძო სექტორს ნაკლები შეხება ჰქონდეს შემოსავლების სამსახურთან და მისთვის საჭირო ყველა ოპერაცია გადამხდელმა ინტერნეტით განახორციელოს, თუმცა თუკი მას დასჭირდა შემოსავლების სამსახურის მომსახურება, ეს უნდა იყოს მარტივი, კომფორტული არაბიუროკრატიული პროცესი," - განაცხადა პრემიერ-მინისტრმა.
„ეს არის თანამედროვე ოფისი, რომელიც სრულად შეესაბამება ევროპულ სტანდარტებს. თბილისის რეგიონული ცენტრისთვის შეიქმნა ახალი გამჭვირვალე შენობა, გაკეთდა სპეციალური ვიტრაჟები, რათა შემოსავლების სამსახურის მუშაობა მაქსიმალურად ტრანსპარენტული იყოს საზოგადოებისთვის. ახალ სათაო ოფისში განთავსებულია რამდენიმე დარბაზი, შექმნილია ღია ტიპის სამუშაო გარემო," - განაცხადა ფინანსთა მინისტრმა კახა ბაინდურაშვილმა.
თბილისის რეგიონულ ცენტრში ამჟამად 300 თანამშრომელი მუშაობს. შენობის სარემონტო სამუშაოსთან ერთად, კეთილმოეწყო და გამწვანდა ეზო..
ფინანსთა სამინისტროს მტკიცებით, ფინანსთა სამინისტროს შემოსავლების სამსახური დედაქალაქის მასშტაბით გადამხდელებს ერთიანი სტანდარტების, მაღალი ხარისხის სერვისს სთავაზობს, რომელიც ბიზნესზეა ორიენტირებული.
მასალის გამოყენების პირობები