5 თვეში, ბათუმის ბულვარში, ანბანის კოშკი აშენდება. სიმბოლური კაფსულა პრეზიდენტმა მიხეილ სააკაშვილმა აჭარის მთავრობის თავმჯდომარესთან, თბილისის მერთან, ბათუმის მერთან და საქართველოს მთავრობის წარმომადგენლებთად ერთად, მონუმენტის აგების ადგილას დღეს ჩადო.
130 მეტრის სიმაღლის კოშკი ესპანელმა არქიტექტორმა ალბერტო დომინგო კაბომ დააპროექტა. კოშკი სფეროს ფორმის კონსტრუქციით ბოლოვდება, სადაც 4 სართული იქნება განთავსებული. აქ ტელესტუდიები, ობსერვატორია და მბრუნავი რესტორანი გაკეთდება, რომელიც ერთი წრის გაკეთებას ერთი საათი მოანდომებს. ანბანის თითო ასობგერის სიმაღლე 7 მეტრი იქნება.
მანვე განაცხადა, რომ ბათუმში საბაგირო გზის და ფუნიკულიორის აშენებაც იგეგმება.
"დღეს ვხსნით ბათუმის ეიფელის კოშკის მშენებლობას და გვჭირდება 5 თვე, რომ ეს ყველაფერი გაკეთდეს. ეს არის სახელმწიფო და კერძო ინვესტიცია და მთაზე ასევე იწყება ფუნიკოლიორის მშენებლობა. საუბარია საბაგირო გზაზეც და ბათუმს ექნება ფუნიკულიორი და ბათუმს ექნება ანძა. აქ იქნება სატელევიზიო სტუდიები. ძალიან მაგარი მოტრიალე რესტორანი. მაგრამ აქ მთავარი იდეა არის ქართული ანბანი, ქართული ანბანი არის ჩვენი დნმ და აქ ანძა არის გაკეთებული, როგორც გენეტიკური კოდი და თუ დააკვაირდებით, ის არცერთ სხვა ანძას მსოფლიოში არ გავს. ეს პრაქტიკულად არის ქართული ანბანის დიდი მონუმენტი, რომელიც აქ იხსნება", - განაცხადა პრეზიდენტმა.
პროექტი ბათუმის მერიის ბიუჯეტიდან დაფინანსდა და მისი მშენებლობა 5 თვეში უნდა დასრულდეს. ანბანის კოშკს ქართული კომპანია "მაგისტილი" ააშენებს. მშენებლობებზე 100-მდე ადგილობრივი მუშახელი დასაქმდება.
