რუსეთის ფედერაციის შს მინისტრი რაშიდ ნურგალიევი აცხადებს, რომ ჩეჩენი ბოევიკების მიერ ჩეჩნეთის პარლამენტის შენობაზე თავდასხმას სამი ადამიანის სიცოცხლე შეეწირა. ინფორმაციას ამის შესახებ რუსული მედია ავრცელებს. ნურგალიევმა ეს განცხადება ჩეჩენი მებრძოლების ლიკვიდაციის სპეცოპერაციის დასრულების შემდეგ გააკეთა.
"ბოევიკებმა ჩეჩნეთის პარლამენტის შენობაში შეღწევა სცადეს, მაგრამ მათ ეს ისევე როგორც ყოველთვის ვერ მოახერხეს. მათ გზაზე შს სამინისტროს ორგანოების თანამშრომლები გადაეღობნენ. სამწუხაროდ, დანაკარგის გარეშე ამ ყველაფერს არ ჩაულია: მილიციის ორი თანამშრომელი დაიღუპა, ერთი დაღუპული სამოქალაქო პირია, კიდევ სამი საავადმყოფოში იმყოფება", _ განაცხადა მან.
აღსანიშნავია, რომ ჩეჩნეთის პროკურატურის მიერ გავრცელებული ინფორმაციით, დაჭრილია 17 ადამიანი. აქედან 6 სამართალდამცავია, 11 კი სამოქალაქო პირი.
შეგახსენებთ, რომ ჩეჩნეთის პარლამენტის ტერიტორიაზე დღეს ტერორისტ-თვითმკვლელების თავდასხმა მოხდა. დილით როდესაც დეპუტატები თავიანთი ავტომობილებით პარლამენტის შენობის ეზოში შედიოდნენ, მათთან ერთად ტერორისტების სავსე ავტომობილიც შევიდა. ერთ-ერთმა მათგანმა თავი აიფეთქა, ორმა ტერორისტმა პარლამენტის შენობამდე მიღწევა შეძლო. ავტომატური ცეცხლსასროლი იარაღიდან სროლა პარლამენტის ტერიტორიაზე რამდენიმე წუთი მიმდინარეობდა. პარლამენტის შენობიდან მთელი სამოქალაქო პერსონალის ევაკუაცია მოხდა.
მებრძოლების განადგურების ოპერაციას ჩეჩნეთის მეთაური რამზან კადიროვი ხელმძღვანელობდა.
