ავიაკომპანიები ევროკავშირსა და აშშ-ს ერთიანი სამგზავრო ტესტირების სისტემის შექმნისკენ მოუწოდებენ, რათა კვლავ დაუშვან ტრანსატლანტიკური გადაადგილება. შესაბამისი წერილი უკვე გადაეგზავნა აშშ-ს ვიცე-პრეზიდენტს მაიკლ პენსსა და ევროკავშირის შინაგან საქმეთა კომისარს ილვა იოჰანსონს.
აღნიშნულ ინიციატივას ეთანხმებიან და ხელს აწერენ ისეთი ავიაკომპანიები როგორებიცაა American Airlines-ი, United Airlines-ი, Lufthansa და ჰოლდინგი International Airlines Group-ი, რომლის შემადგენლობაშიც British Airways-ი და Iberia შედიან.
"გლობალური ეკონომიკისა და ჩვენი ბიზნესის ეკონომიკური აღდგენისთვის, ასევე ტრანსატლანტიკური ფრენების მნიშვნელობის გათვალისწინებით ვფიქრობთ, რომ აშშ-სა და ევროპას შორის საჰაერო ფრენების აღდგენა აუცილებელია", - აღნიშნულია წერილში.
შეგახსენებთ, რომ აშშ-ს მოქალაქეებისათვის და რეზიდენტებისთვის ევროკავშირის საზღვარი დაკეტილია, ისევე როგორც ევროკავშირის მოქალაქეებისათვის აშშ-ს საზღვარი - გამონაკლისი შემთხვევების გარდა.