ქუთაისში 30 წლის ქალის მკვლელობის ბრალდებით დაკავებულ ბიკე კასიმოვას ორთვიანი პატიმრობა შეეფარდა.
მოსამართლემ პროკურატურის შუამდგომლობა პატიმრობასთან დაკავშირებით სრულად გაითვალისწინა. დაკავებულმა ბიკე კასიმოვამ სასამართლოს წინაშე არ ისაუბრა.
ადვოკატის თქმით, დაკავებული წარდგენილ ბრალს არ აღიარებს, თუმცა ამ ეტაპზე პატიმრობას ეთანხმებიან. მისივე თქმით, ბიკე კასიმოვას მდგომარეობა მძიმეა, არაა გამორიცხული ფსიქიატრიული ექსპერტიის ჩატარება მოითხოვონ.
ბიკე კასიმოვა განზრახ მკვლელობის ბრალდებით 20 ივლისს დააკავეს. გამოძიებით დადგინდა, რომ ბრალდებულმა ქალმა მიმდინარე წლის 18 ივლისს, ქუთაისში, ზვიად გამსახურდიას გამზირზე მდებარე საცხოვრებელ ბინაში, თავის მეგობართან - 1989 წელს დაბადებულ ე.ჩ.-სთან სტუმრად ყოფნის დროს, ურთიერთშელაპარაკების ნიადაგზე, მასპინძელს ცივი იარაღით რამდენიმე ჭრილობა მიაყენა და შემთხვევის ადგილიდან მიიმალა. მიყენებული დაზიანებების შედეგად, ე.ჩ. ადგილზე გარდაიცვალა.
გამოძიება განზრახ მკვლელობის ფაქტზე, საქართველოს სსკ-ის 108-ე მუხლით მიმდინარეობს.
