რუსეთი კვლავაც აგრძელებს გაყინული კონფლიქტების საქართველოს წინააღმდეგ გამოყენებას, რათა ძირი გამოუთხაროს მის სტაბილურობას და ევროპულ საზოგადოებისკენ სწრაფვის სიცოცხლისუნარიანობას. ამის შესახებ ნათქვამია სახელმწიფო დეპარტამენტის ჯერ არგამოუქვეყნებელ ანგარიშში, რომელიც საერთაშორისო გამოცემა Foreign Policy-მ მოიპოვა.
ანგარიშში აღნიშნულია, რომ რუსეთმა 2019 წელს საქართველოს ოკუპირებული რეგიონები, აფხაზეთი და ცხინვალის რეგიონი, 275 მილიონი დოლარით დააფინანა.
ხაზგასმულია, რომ ეს რეგიონები სეპარატისტული რესპუბლიკებია, რომელიც საქართველოს ტერიტორიის დაახლოებით მეხუთედს შეადგენს და ისინი რუსეთის სამხედრო ძალებმა 2008 წლის აგვისტოს ომის შემდგომ დაიკავეს.
"რუსეთი განაგრძობს გაყინული კონფლიქტების [აფხაზეთის და სამხრეთ ოსეთის ჩათვლით] გამოყენებას, რათა ძირი გამოუთხაროს საქართველოს დამოუკიდებლობას, სტაბილურობას, დააკნინოს ქვეყნის ეკონომიკური მიმზიდველობა, როგორც პოტენციური ეკონომიკური პარტნიორის და გაართულოს მისი მისწრაფებები ნატოსა და ევროკავშირისკენ", - ნათქვამია მოხსენებაში.
აღნიშნულია, რომ რუსეთი არ ასრულებს 2008 წლის ცეცხლის შეწყვეტის შესახებ შეთანხმებას, რომელიც ითვალისწინებს რუსეთის შეიარაღებული ძალების დაბრუნებას ომამდე არსებულ პოზიციებზე.
"ის ასევე არ ასრულებს მის მიერვე აღებულ ვალდებულებას, უზრუნველყოს ჰუმანუტარული ორგანიზაციების დაშვება ოკუპირებულ რეგიონებში", - ნათქვამია ანგარიშში.
ანგარიშში ასევე საუბარია 2008 წლის ომის შემდგომ შეერთებული შტატების მიერ საქართველოსთვის გაწეული დახმარების შესახებ.