დღეს, ევროკომისიამ ევროპის წამლის სააგენტოს რეკომენდაციაზე, Covid-19-ის სამკურნალოდ რემდესივირის გამოყენების თაობაზე, დადებითი სანქცია გასცა. ამის შესახებ ევროკომისარმა ჯანმრთელობისა და სურსათს უსაფრთხოების საკითხებში, სტელა კირიაკიდისმა განაცხადა.
"კორონავირუსის სამკურნალო პირველი მედიკამენტის ავტორიზაცია უაღრესად მნიშვნელოვანი ნაბიჯია ვირუსის წინააღმდეგ ბრძოლაში", - განაცხადა კირიაკიდისმა.
ევროპის წამლის სააგენტომ რემდესივირი Covid-19-is სამკურნალო მედიკამენტად 25 ივნისს დაარეგისტრირა. გადაწყვეტილება ძალაში შესვლისთვის ევროკომისიის სანქციას საჭიროებდა.
ამგვარად, რემდესივირი პირველი პრეპარატი გახდა, რომელსაც კორონავირუსის სამკურნალოდ ევროკავშირის ტერიტორიაზე გამოიყენებენ.
ჯანდაცვის რეგულატორის განცხადებით, პრეაპარატის გამოყენება რეკომენდებულია პნევმონიის მქონე მოზრდილებსა და 12 წლის ზემოთ ასაკის ბავშვებში, რომლებიც ჟანგბადს საჭიროებენ.
რემედსივირს, რომელიც თავდაპირველად ვირუს ებოლას საწინააღმდეგოდ შეიქმნა, ამჟამად კლინიკურ კვლევებს უტარებენ მთელს მსოფლიოში, მისი ეფექტების უკეთ გასაგებად.
შეგახსენებთ, 2 მაისს, შეერთებული შტატების სურსათისა და მედიკამენტების ადმინისტრაციამ კორონავირუსის სამკურნალოდ "რემდესივირის" გამოყენების ნებართვა გასცა.
რემდისივირის წარმოების ექსკლუზიურ უფლებას ამერიკული ფარმაცევტული გიგანტი "გილეადი"ფლობს.
