სახელისუფლებო პარტიის, "ქართული ოცნების" ლობისტური კომპანია Hogan Lovells-ი შეერთებული შტატების კონგრესმენებს, მათ მიერ მომზადებული სტრატეგიული დოკუმენტის საპასუხოდ, წერილს უგზავნის.
ლობისტების წერილი, რომელსაც თან "ქართული ოცნების" განცხადებაც ერთვის, აშშ-ის იუსტიციის დეპარტამენტის ვებგვერდზე გამოქვეყნდა.
წერილში ნათქვამია, რომ "ქართული ოცნება" შეშფოთებულია ივანიშვილთან დაკავშირებული ნეგატიური განცხადების გამო.
"ქართული ოცნების" პარტია დიდად აფასებს, რომ სტრატეგიის შემოთავაზება ადასტურებს საქართველოს მტკიცე ერთგულებას აშშ-საქართველოს სტრატეგიული პარტნიორობის მიმართ. "ქართული ოცნება“ გამოხატავს გარკვეულ შეშფოთებას ნეგატიური განცხადების გამო, რომელიც ეხება ქართული ოცნების ლიდერსა და დამფუძნებელს, საქართველოს ყოფილ პრემიერ მინისტრ ბიძინა ივანიშვილს. როგორც ჩანს, ეს კომენტარები გაკეთდა ყოველგვარი დოკუმენტური დასაბუთების გარეშე.
"ქართული ოცნება“ აღნიშნავს, რომ მათი ხელისუფლებაში ყოფნის დროს, საქართველო დასავლურ ალიანსთან და აშშ-თან ყველაზე მეტად დაახლოვდა. "ქართული ოცნება" მოუთმენლად ელის "რესპუბლიკური კვლევითი კომიტეტის" წევრებთან მუშაობას აშშ-საქართველოს ურთიერთობების კიდევ უფრო განმტკიცებისთვის", - ნათქვამია ლობისტების წერილში.
შეგახსენებთ, შეერთებული შტატების კონგრესის წარმომადგენელთა პალატის რესპულიკელმა წევრებმა გამოაქვეყნეს სტრატეგიის დოკუმენტი - "ამერიკის გაძლიერება და გლობალური საფრთხეების წინააღმეგ ბრძოლა".
დოკუმენტში, რომელსაც ხელს აწერენ კონგრესმენები - ჯონსონი, უილსონი, უიტმენი, ვაგნერი, მუნი, ბეკონი, ბერგმანი, დანი, ჰიგინსი, ნორმანი, კრენშოუ, შტაილი და უოლცი, საქართველოზეც არის საუბარი.
ამავე დოკუმენტში ფართოდ არის განხილული პუტინის რეჟიმის როლი მეზობელი ქვეყნების სუვერენიტეტების ხელყოფაში. ამ კონტექსტში კონგრესმენები გარდაუვლად მიიჩნევენ რუსეთისთვის სანქციების დაწესებას.
"კონგრესმა სანქციები უნდაა დააწესოს მათზე ვინც დგას რუსული პროპაგანდის უკან და ძირს უთხრის შეერთებული შტატების პარტნიორების, ყოფილ საბჭოთა რესპუბლიკებს, უსაფრთხოებას", - ნათქვამია დოკუმენტში.
კონგრესმენები მოუწოდებენ აშშ-ის სახელმწიფო დეპარტამენტს, მოამზადოს ანგარიში კრემლთან დაკავშირებული ოლიგარქების შესახებ, რომლებიც რუსეთის აგრესიას აფინანსებენ.
"ბიძინა ივანიშვილი, ყველაზე მდიდარი საქართველოში, პუტინის ახლო მოკავშირეა და მონაწილეობს საქართველოში ვითარების დესტაბილიზაციაში რუსეთის სასარგებლოდ", - ნათქვამია დოკუმენტში.
სტრატეგიის დოკუმენტში აღნიშნულია, რომ კონგრესმა უნდა გააგრძელოს საქართველოს თავდაცვითი შესაძლებლობების გაძლიერების მხარდაჭერა.