საქართველოს პრემიერ მინისტრთან ერთად აშშ-ში სამუშაო ვიზიტით ენერგეტიკის მინისტრი ალექსანდრე ხეთაგურიც იმყოფება.
"საქართველო არის ენერგეტიკული დერეფანი, რომლის გავლითაც ხორციელდება გაზის, ელექტროენერგიის და ნავთობის ექსპორტი. ამ კუთხით დამატებითი პროექტები და განვითარება მნიშვნელოვანი იქნება არა მარტო საქართველოსთვისა და რეგიონისთვის, არამედ ევროპის ენერგეტიკული უსაფრთხოებისთვის. ამერიკის შეერთებული შტატების სახელმწიფო მდივნის მოადგილესთან ენერგეტიკის საკითხებში, ჩვენ განვიხილეთ ელექტროენერგიის შესაძლო ტრანზიტი თურქეთის გავლით ერაყში, რაც საინტერესო თემა იქნება როგორც თურქეთისთვის, ერაყისთვის, ამერიკის შეერთებული შტატებისთვის, ასევე საქართველოსთვის. საქართველო შესაძლოა გადაიქცეს ენერგეტიკულ ცენტრად მთელს რეგიონში" - განაცხადა ნიკა გილაურმა.
პრემიერ-მინისტრს მოლაპარაკეკები ჰქონდა ამერიკის ექსპორტ-იმპორტის ბანკის ხელმძღვანელობასთან. მხარეები შეთანხმდნენ, რომ გაფორმდება მემორანდუმი, რომელმაც ხელი უნდა შეუწყოს ამერიკული კერძო ინვესტიციების მოზიდვას საქართველოში.
"მემორანდუმი გაფორმდება საქართველოს მთავრობასა და ფინანსურ კორპორაცია "ექსიმ ბანკს" შორის. „ექსიმ ბანკი" საქართველოში პირველად შემოვა და ენერგეტიკულ პროექტებს დააფინანსებს. მათ შორის იქნება შავ ზღვაზე გაზის გამათხევადებელი ქარხნის მშენებლობა"- განაცხადა ალექსანდრე ხეთაგურმა.
